ಲಖನೌ: ಈ ಬಾರಿಯ ಐಪಿಎಲ್ನಲ್ಲಿ ಮೊದಲ ಬಾರಿಗೆ ಸೂಪರ್ ಓವರ್ವರೆಗೆ ಸಾಗಿದ ಪಂದ್ಯದಲ್ಲಿ ಕೋಲ್ಕತ್ತ ನೈಟ್ ರೈಡರ್ಸ್ ತಂಡವು ಲಖನೌ ಸೂಪರ್ ಜೈಂಟ್ಸ್ ತಂಡದ ವಿರುದ್ಧ ರೋಚಕ ಜಯ ಸಾಧಿಸಿತು. ಎಡಗೈ ವೇಗಿ ಮೊಹ್ಸಿನ್ ಖಾನ್ ಅವರು ಐದು ವಿಕೆಟ್ ಗೊಂಚಲು ಸಾಧನೆ ಮೆರೆದರು. ಛಲ ಬಿಡದೆ ಆಡಿದ ಕೆಕೆಆರ್ನ ರಿಂಕು ಸಿಂಗ್
(ಔಟಾಗದೇ 83; 51ಎ, 4×7, 6×5) ಅರ್ಧಶತಕ ಗಳಿಸಿ, ತಂಡಕ್ಕೆ ಆಸರೆಯಾದರು.ಇದರಿಂದಾಗಿ, ಕೆಕೆಆರ್ 20 ಓವರ್ಗಳಲ್ಲಿ 7 ವಿಕೆಟ್ಗಳಿಗೆ 155 ರನ್ ಗಳಿಸಿತು.ಗುರಿ ಬೆನ್ನಟ್ಟಿದ ಲಖನೌ ತಂಡದ ಏಡನ್ ಮರ್ಕರಂ (31; 27ಎ) ಹಾಗೂ ರಿಷಭ್ ಪಂತ್ (42; 38ಎ) ಹೋರಾಟ ನಡೆಸಿದರು. ಕೊನೆಯ ಎಸೆತದಲ್ಲಿ ಗೆಲುವಿಗೆ 7 ರನ್ ಅಗತ್ಯ ವಿದ್ದಾಗ ಮೊಹಮ್ಮದ್ ಶಮಿ ಸಿಕ್ಸರ್ ಸಿಡಿಸಿದರು. ಹೀಗಾಗಿ, ಪಂದ್ಯ ಟೈ ಆಗಿ ಸೂಪರ್ ಓವರ್ಗೆ ಸಾಗಿತು. ಕೆಕೆಆರ್ ಪರ
ಸುನಿಲ್ ನಾರಾಯಣ್ ಅವರು ಸೂಪರ್ ಓವರ್ನ ಮೊದಲ ಎಸೆತದಲ್ಲಿ ನಿಕೊಲಸ್ ಪೂರನ್ ಅವರನ್ನು ಕ್ಲೀನ್ ಬೌಲ್ಡ್ ಮಾಡಿದರು. ಎರಡನೇ ಎಸೆತದಲ್ಲಿ ಪಂತ್ ಒಂದು ರನ್ ತೆಗೆದುಕೊಂಡರು. ಮೂರನೇ ಎಸೆತದಲ್ಲಿ ಏಡನ್ ಮರ್ಕರಂ ಅವರು ರೋವ್ಮನ್ ಪೊವೆಲ್– ರಿಂಕು ಹಿಡಿದ ಕ್ಯಾಚ್ಗೆ ಬಲಿಯಾದರು.
2 ರನ್ ಗುರಿ ಬೆನ್ನಟ್ಟಿದ ಕೋಲ್ಕತ್ತ ತಂಡದ ರಿಂಕು ಸಿಂಗ್ ಮೊದಲ ಎಸೆತದಲ್ಲಿಯೇ ಬೌಂಡರಿ ಗಳಿಸಿ, ಗೆಲುವು ತಂದಿತ್ತರು. ಮೊದಲು ಬ್ಯಾಟ್ ಮಾಡಿದ ಕೆಕೆಆರ್ ಮೊಹ್ಸಿನ್ (4–1–23–5) ದಾಳಿಯ ಮುಂದೆ 93 ರನ್ಗಳಿಗೇ 7 ವಿಕೆಟ್ ಕಳೆದುಕೊಂಡಿದ್ದ ತಂಡದ ಪರ ರಿಂಕು ಏಕಾಂಗಿ ಹೋರಾಟ ನಡೆಸಿದರು. ಅದರಿಂದಾಗಿ ತಂಡದ ಮೊತ್ತ ಹೆಚ್ಚಿತು. ರಿಂಕು ಬಿಟ್ಟರೆ ಕ್ಯಾಮರಾನ್ ಗ್ರೀನ್ (34 ರನ್) ಅವರೊಬ್ಬರೇ ಎರಡಂಕಿ ಗಳಿಸಿದವರು.
ಸಂಕ್ಷಿಪ್ತ ಸ್ಕೋರು: ಕೋಲ್ಕತ್ತ ನೈಟ್ ರೈಡರ್ಸ್: 20 ಓವರ್ಗಳಲ್ಲಿ 7 ವಿಕೆಟ್ಗಳಿಗೆ 155 (ಕ್ಯಾಮರಾನ್ ಗ್ರೀನ್ 34, ರಿಂಕು ಸಿಂಗ್ ಔಟಾಗದೇ 83, ಮೊಹ್ಸಿನ್ ಖಾನ್ 23ಕ್ಕೆ5). ಲಖನೌ ಸೂಪರ್ ಜೈಂಟ್ಸ್: 20 ಓವರ್ಗಳಲ್ಲಿ 8 ವಿಕೆಟ್ಗಳಿಗೆ 155 (ಏಡನ್ ಮರ್ಕರಂ 31, ರಿಷಭ್ ಪಂತ್ 42, ಆಯುಷ್ ಬಡೋನಿ 24; ವೈಭವ್ ಅರೋರಾ 24ಕ್ಕೆ2, ವರುಣ್ ಚಕ್ರವರ್ತಿ 33ಕ್ಕೆ2).
ಸೂಪರ್ ಓವರ್: ಲಖನೌ ಸೂಪರ್ ಜೈಂಟ್ಸ್: 0.3 ಓವರ್ನಲ್ಲಿ 2 ವಿಕೆಟ್ಗಳಿಗೆ 1; ಕೋಲ್ಕತ್ತ ನೈಟ್ ರೈಡರ್ಸ್: 0.1 ಓವರ್ನಲ್ಲಿ ವಿಕೆಟ್ ನಷ್ಟವಿಲ್ಲದೆ 4.
