*ಗಂಗಾಧರ ಕಲ್ಲಪಳ್ಳಿ.
ಸುಳ್ಯ:ಸುಳ್ಯ ನಗರದಲ್ಲಿ ಸಂಗ್ರಹಿಸಲಾಗುವ ಕಸವನ್ನು ಆಧುನಿಕ ತಂತ್ರಜ್ಞಾನ ಬಳಸಿ ವಿಲೇವಾರಿ ಮಾಡಲು ಕಲ್ಚರ್ಪೆಯಲ್ಲಿ ಅಳವಡಿಸಲಾದ ಬರ್ನಿಂಗ್ ಮೆಷಿನ್ ಕೊನೆಗೂ ಚಾಲೂ ಆಗಿದೆ. ಸುಳ್ಯ ನಗರದಲ್ಲಿ ಪ್ರತಿ ದಿನ ಸಂಗ್ರಹಿಸಲಾಗುವ ಒಣ ಕಸ ಸೇರಿ ಸುಮಾರು 500 ಕೆಜಿಯಷ್ಟು ತ್ಯಾಜ್ಯವನ್ನು ಪ್ರತಿ ದಿನ ಉರಿಸಲಾಗುತಿದೆ ಎಂದು ಸುಳ್ಯ ನಗರ ಪಂಚಾಯತ್ ಅಧ್ಯಕ್ಷ ವಿನಯಕುಮಾರ್ ಕಂದಡ್ಕ ಹಾಗು ಮುಖ್ಯಾಧಿಕಾರಿ ಸುಧಾಕರ ಎಂ.ಎಚ್.ಮಾಹಿತಿ ನೀಡಿದ್ದಾರೆ. ಬರ್ನಿಂಗ್ ಮೆಷಿನ್ ಅಳವಡಿಕೆ ಆಗಿ ಸರಿ ಸುಮಾರು ಒಂದು ವರ್ಷದ ಬಳಿಕ ಮೆಷಿನ್ ಚಾಲೂ
ಆಗಿದೆ. ಇದೀಗ 3 ತಿಂಗಳ ಮಟ್ಟಿಗೆ ಪ್ರಾಯೋಗಿಕ ನೆಲೆಯಲ್ಲಿ ಚಾಲನೆ ಮಾಡಲಾಗುತ್ತಿದ್ದು ಒಂದೂವರೆ ತಿಂಗಳಿನಿಂದ ಕಸದ ಬರ್ನಿಂಗ್ ನಡೆಯುತಿದೆ. ಆಗಸ್ಟ್ ತಿಂಗಳಲ್ಲಿ ಇದೂವರೆಗೆ 6 ಸಾವಿರ ಕೆಜಿ ಕಸ ಉರಿಸಲಾಗಿದೆ. ವಿದ್ಯುತ್ ಸರಬರಾಜಿನಲ್ಲಿ ವೊಲ್ಟೇಜ್ ವೇರಿಯೇಷನ್ ಆಗುವ ಕಾರಣ ಯಂತ್ರಗಳು ಸಮರ್ಪಕವಾಗಿ ಕೆಲಸ ಮಾಡಲು ಆಗುತ್ತಿರಲಿಲ್ಲ. ಇದೀಗ ಜನರೇಟರ್ ಬಳಸಿ ಮೆಷಿನ್ ಚಾಲೂ ಮಾಡಿ ಬರ್ನಿಂಗ್ ಪ್ರಕ್ರಿಯೆ ನಡೆಯುತಿದೆ. ಹೊಸ ವಿದ್ಯುತ್ ಟಿಸಿ ಅಳವಡಿಕೆ ಸೇರಿ ಕೆಲವೊಂದು ಕೆಲಸಗಳು ನಡೆಸಿ ಪೂರ್ಣವಾಗಿ ವಿದ್ಯುತ್ ಬಳಸಿ ಮೆಷಿನ್ ರನ್ ಮಾಡುವ ಬಗ್ಗೆ ಮತ್ತು ಕಸ ಉರಿದು ಉಂಟಾಗುವ ಗ್ಯಾಸ್ ಬಳಸಿ ಜನರೇಟರ್ ಚಾಲನೆ ಮಾಡಿ ಮೆಷಿನ್ ಚಾಲೂ ಮಾಡುವ ಸಂಶೋಧನೆಗಳು ನಡೆಯುತಿದೆ. ಸೆಪ್ಟೆಂಬರ್ ಕೊನೆಯ ವೇಳೆಗೆ ನಿರೀಕ್ಷಿತ ಪ್ರಮಾಣದಲ್ಲಿ ಕಸ ಬರ್ನ್ ಮಾಡುವ ಮಟ್ಟಕ್ಕೆ ಮೆಷಿನ್ ಸಜ್ಜು ಆಗುವ ನಿರೀಕ್ಷೆ ಇದೆ ಎಂದು ನಗರ ಪಂಚಾಯತ್ ಅಧ್ಯಕ್ಷರು ಹಾಗು ಮುಖ್ಯಾಧಿಕಾರಿಗಳು ಹೇಳುತ್ತಾರೆ.
ಏನಿದು ಯೋಜನೆ:
ನಗರ ಪಂಚಾಯತ್‌ನ ಈ ಮಹತ್ವಾಕಾಂಕ್ಷಿ ಯೋಜನೆಯಿಂದ ನಗರದ ಕಸ ವಿಲೇವಾರಿ ಸಮಸ್ಯೆಗೆ ಶಾಶ್ವತ ಪರಿಹಾರ ಕಾಣುವುದು ಬರ್ನಿಂಗ್ ಮೆಷಿನ್ ಅಳವಡಿಕೆಯ ಉದ್ದೇಶ. ನಗರ ಪಂಚಾಯತ್‌ನ ಕಸ ವಿಲೇವಾರಿ ಘಟಕ ಕಲ್ಚರ್ಪೆಯಲ್ಲಿ ಅಳವಡಿಸಲಾಗಿರುವ ಬರ್ನಿಂಗ್ ಮೆಷಿನ್ ‘ಗ್ಯಾಸಿಫಿಕೇಶನ್ ತಂತ್ರಜ್ಞಾನ’ದ ಮೂಲಕ ಕಸವನ್ನು ಉರಿಸಲಾಗುತ್ತದೆ. ಪರಿಸರ ಸ್ನೇಹಿಯಾದ ಈ ಯಂತ್ರದಲ್ಲಿ ಕಸವನ್ನು ವಿಲೇವಾರಿ ಮಾಡಿದಾಗ ಗ್ಯಾಸ್
ಉತ್ಪಾದನೆ ಆಗುತ್ತಿದ್ದು ಇದನ್ನು ಮರು ಬಳಕೆ ಮಾಡಬಹುದು. ಸುಳ್ಯ ನಗರದಲ್ಲಿ ಪ್ರತಿ ದಿನ ಸಂಗ್ರಹವಾಗುವ ಕಸ ಮತ್ತು ಈಗಾಗಲೇ ಕಲ್ಚರ್ಪೆ ಹಾಗು ನಗರ ಪಂಚಾಯತ್ ಮುಂಭಾಗದಲ್ಲಿ ಶೇಖರಿಸಲಾಗಿರುವ ಕಸವನ್ನು ಯಂತ್ರದ ಮೂಲಕ ಉರಿಸಲಾಗುವುದು. ಸುಮಾರು 40 ಲಕ್ಷ ರೂ ವೆಚ್ಚದಲ್ಲಿ ಅಳವಡಿಸಲಾದ ಬರ್ನಿಂಗ್ ಯಂತ್ರದಲ್ಲಿ ಒಂದು
ಗಂಟೆಯಲ್ಲಿ 150 ಕೆಜಿ ತ್ಯಾಜ್ಯವನ್ನು ಉರಿಸಬಹುದು. ದಿನ ನಿತ್ಯ ಸುಳ್ಯ ನಗರದಲ್ಲಿ ಒಂದು ಟನ್ ಗಿಂತಲೂ ಹೆಚ್ಚು ಕಸ ಸಂಗ್ರಹ ಆಗುತ್ತದೆ. ಸುಮಾರು ಎಂಟು ಗಂಟೆಗಳಲ್ಲಿ ಇಷ್ಟು ಕಸ ಉರಿಸಲು ಸಾಧ್ಯ. ಉರಿದಾಗ ಗ್ಯಾಸ್ ದೊರೆಯುತ್ತದೆ. ಗ್ಯಾಸನ್ನು ಸಂಗ್ರಹಿಸಿ ಬಳಕೆ ಮಾಡಬಹುದು.ಎನ್ನುತ್ತಾರೆ ನಗರ ಪಂಚಾಯತ್ ಅಧ್ಯಕ್ಷ ವಿನಯಕುಮಾರ್ ಕಂದಡ್ಕ. ಸುಮಾರು 2500 ಟನ್ ಗೂ ಮಿಕ್ಕಿ ಕಸ ಈಗಾಲೇ ಕಲ್ಚರ್ಪೆಯಲ್ಲಿ ರಾಶಿ ಬಿದ್ದಿದೆ. ಅದನ್ನು ಮೆಷಿನ್ ಮೂಲಕ ಬರ್ನ್ ಮಾಡಿ ವಿಲೇವಾರಿ ಮಾಡಲಾಗುವುದು. ನೂರಾರು ಟನ್ ಕಸ ನಗರ ಪಂಚಾಯತ್ ಬಳಿಯಲ್ಲಿ ಹಾಗು ಮುಂಭಾಗದ ಕಟ್ಟಡದಲ್ಲಿಯೂ ಇದೆ.
ಕಸದ ಸಮಸ್ಯೆ ಏನು:
ಸುಳ್ಯ ನಗರವನ್ನು ಕಳೆದ ಕೆಲವು ದಶಕಗಳಿಂದ ಕಾಡುವ ದೊಡ್ಡ ಸಮಸ್ಯೆ ಕಸ ವಿಲೇವಾರಿ. ಕಸ ಸಂಗ್ರಹಕ್ಕೆ ಮತ್ತು ವಿಲೆವಾರಿಗೆಂದು ಲಕ್ಷಾಂತರ ರೂಗಳನ್ನು ವ್ಯಯಿಸಲಾಗಿದೆ. ತ್ಯಾಜ್ಯ ವಿಲೇವಾರಿ ಘಟಕದ ಸ್ಥಳಕ್ಕೆ ದೊಡ್ಡ ಹೋರಾಟವೇ ನಡೆಸಬೇಕಾಯಿತು. ಕಲ್ಚರ್ಪೆಯಲ್ಲಿ ತ್ಯಾಜ್ಯ ಘಟಕಕ್ಕೆ ಸ್ಥಳ ದೊರೆತರೂ ಅಲ್ಲಿ ವೈಜ್ಞಾನಿಕವಾಗಿ ಕಸ ವಿಲೇವಾರಿ ಮಾಡದ ಕಾರಣ ಕಸ ತುಂಬಿ ತುಳುಕಿತ್ತು.ಬೇರೆ ಹಲವು ಕಡೆಗಳಲ್ಲಿ ಜಾಗ ಹುಡುಕಿದರೂ ವಿರೋಧಗಳು ಮತ್ತು ತಾಂತ್ರಿಕ ಅಡಚಣೆಗಳಿಂದ ಸೂಕ್ತ ಜಾಗ ಸಿಕ್ಕಿರಲಿಲ್ಲ.ಕಲ್ಚರ್ಪೆಯಲ್ಲಿ ಕಸ ಹಾಕಲು ಆಗದ ಕಾರಣ ನಗರದಲ್ಲಿ ಸಂಗ್ರಹವಾಗುವ ತ್ಯಾಜ್ಯವನ್ನು ಕಳೆದ ಕೆಲವು ವರ್ಷಗಳಿಂದ ನಗರ ಪಂಚಾಯತ್ ಮುಂಭಾಗದ ಕಟ್ಟಡದಲ್ಲಿಯೇ ತುಂಬಿಡಲಾಗುತ್ತಿತ್ತು.ನಗರದ ಕಸ ವಿಲೇವಾರಿ ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡುಕೊಳ್ಳಬೇಕು ಎಂಬ ಬೇಡಿಕೆ ಇತ್ತು. ನಗರ ಪಂಚಾಯತ್‌ನ ನೂತನ ಆಡಳಿತ ಮಂಡಳಿ ಅಧಿಕಾರಕ್ಕೆ ಬಂದ ಬಳಿಕ ತ್ಯಾಜ್ಯ ವಿಲೇವಾರಿ ಸಮಸ್ಯೆ ಪರಿಹಾರಕ್ಕೆ ಶಾಶ್ವತ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಬರ್ನಿಂಗ್ ಮೆಷಿನ್ ಅಳವಡಿಸಲು ಯೋಜನೆ ರೂಪಿಸಲಾಗಿದೆ. ಬರ್ನಿಂಗ್ ಮೆಷಿನ್ ಪೂರ್ಣ ಪ್ರಮಾಣದಲ್ಲಿ ಕಾರ್ಯಾಚರಿಸಲು ಆರಂಭಿಸಿದರೆ, ಸುಳ್ಯದ ಕಸ ವಿಲೇವಾರಿ ಸಮಸ್ಯೆಗೆ ಶಾಶ್ವತ ಪರಿಹಾರ ಆಗಬಹುದು ಎಂದು ನಿರೀಕ್ಷಿಸಲಾಗಿದೆ.
200 ಟನ್ ಕಸ ಸಾಗಾಟ:
ಸುಳ್ಯ ನಗರ ಪಂಚಾಯತ್ ಮುಂಭಾಗದಲ್ಲಿ ತುಂಬಿಡಲಾದ ಕಸ ಸಾಗಾಟದ ಟೆಂಡರ್ ಅನ್ವಯ 200 ಟನ್ ಕಸ ಸಾಗಾಟ ಮಾಡಲಾಗಿದೆ. ಕೆಜಿಗೆ 3.90 ರೂ.ನಂತೆ ಕಸ ಸಾಗಾಟ ನಡೆಸಿದೆ. ಉಳಿದ ಕಸದ ಸಾಗಾಟಕ್ಕೆ ಟೆಂಡರ್ ಮುಂದುವರಿಸುವ ಕುರಿತು ನ.ಪಂ.ಸಭೆಯಲ್ಲಿ ನಿರ್ಧಾರ ಕೈಗೊಳ್ಳಲಾಗುವುದು ಎಂದು ವಿನಯಕುಮಾರ್ ಕಂದಡ್ಕ ತಿಳಿಸಿದ್ದಾರೆ.
‘ಅತ್ಯಾಧುನಿಕ ಮತ್ತು ಹೊಸ ತಂತ್ರಜ್ಞಾನ ಉಪಯೋಗಿಸಿ ಬರ್ನಿಂಗ್ ಮೆಷಿನ್ ಅಳವಡಿಕೆ ಕಾರ್ಯ ಮಾಡಲಾಗಿದ್ದು ಕಳೆದ ಒಂದೂವರೆ ತಿಂಗಳಿನಿಂದ ಕಸ ಉರಿಸುವಿಕೆ ಯಶಸ್ವಿಯಾಗಿ ನಡೆಯುತಿದೆ.ಹೊಸ ತಂತ್ರಜ್ಞಾನ ಆದ ಕಾರಣ ಕೆಲವೊಂದು ತಾಂತ್ರಿಕ ಸಮಸ್ಯೆಗಳು ಕಂಡು ಬರುತ್ತಿದ್ದು ಅದನ್ನು ಸರಿಪಡಿಸಿ ಕಸ ಉರಿಸಲಾಗುತಿದೆ. ಬರ್ನಿಂಗ್ ಮೆಷಿನ್ ಪೂರ್ಣ ಪ್ರಮಾಣದಲ್ಲಿ ಕಾರ್ಯಾಚರಣೆ ಆದ ಮೇಲೆ ಸುಳ್ಯದ ಕಸ ವಿಲೇವಾರಿ ಸಮಸ್ಯೆ ಶಾಶ್ವತವಾಗಿ ಪರಿಹಾರ ಕಾಣಲಿದೆ.ಈ ಪರಿಸರ ಸ್ನೇಹಿ ಯೋಜನೆಯಿಂದ ಪರಿಸರಕ್ಕೆ ಯಾವುದೇ ತೊಂದರೆ ಇಲ್ಲ. ಇಲ್ಲಿ ಉತ್ಪತ್ತಿಯಾಗುವ ಗ್ಯಾಸ್ ಬಳಕೆ ಮಾಡಿ ಆದಾಯ ಪಡೆಯುವ ಅಥವಾ ಈ ಗ್ಯಾಸ್‌ನಿಂದ ಜನರೇಟರ್ ಚಾಲು ಮಾಡಿ ಮೆಷಿನ್ ರನ್ ಮಾಡುವ ಅವಕಾಶವೂ ಇದೆ
-ವಿನಯಕುಮಾರ್ ಕಂದಡ್ಕ
ಅಧ್ಯಕ್ಷರು. ನಗರ ಪಂಚಾಯತ್ ಸುಳ್ಯ.
“ಸುಳ್ಯ ನಗರದಲ್ಲಿ ಪ್ರತಿ ದಿನ ಸಂಗ್ರಹ ಆಗುವ ಒಣ ಕಸ ಸೇರಿ ಸುಮಾರು 500 ಕೆಜಿ ಕಸ ಬರ್ನ್ ಮಾಡಲಾಗುತಿದೆ. ಮುಂದೆ ವಿದ್ಯುತ್ ಸರಬರಾಜು ಸಂಪರ್ಕ ಸರಿಯಾದ ಮೇಲೆ ದಿನಕ್ಕೆ ಒಂದೂವರೆ ಟನ್ ಕಸ ಉರಿಸಲು ಸಾಧ್ಯ ಆಗಬಹುದು ಎಂಬ ನಿರೀಕ್ಷೆ ಇದೆ
-ಸುಧಾಕರ ಎಂ.ಎಚ್.
ಮುಖ್ಯಾಧಿಕಾರಿ
ನ.ಪಂ.ಸುಳ್ಯ
