ಲಕ್ನೊ:ಇಂಗ್ಲೆಂಡ್ ಬೌಲರ್‌ಗಳ ದಾಳಿಗೆ ಅದೇ ರೀತಿಯ ಉತ್ತರ ನೀಡಿ ಮಾರಕ ದಾಳಿ ಸಂಘಟಿಸಿದ ಭಾರತೀಯ ಬೌಲರ್‌ಗಳ ಸಂಘಟಿತ ಪ್ರಯತ್ನದ ನೆರವಿನಿಂದ ಇಂಗ್ಲೆಂಡ್ ವಿರುದ್ಧ ಭಾರತ ತಂಡ 100 ರನ್ ಅಂತರದ ಭರ್ಜರಿ ಗೆಲುವು ದಾಖಲಿಸಿದೆ. ಈ ಮೂಲಕ ಈ ವಿಶ್ವಕಪ್‌ನಲ್ಲಿ ಅಜೇಯ ಓಟ ಮುಂದುವರಿಸಿರುವ ಭಾರತ ಆರನೇ ಗೆಲುವು ದಾಖಲಿಸಿತು. 12 ಅಂಕಗಳೊಂದಿಗೆ ಭಾರತ ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೆ ಏರಿದೆ. ಆಡಿರುವ 6 ಪಂದ್ಯಗಳಲ್ಲಿ 5ರಲ್ಲಿ ಸೋಲು ಅನುಭವಿಸಿರುವ ಹಾಲಿ ಚಾಂಪಿಯನ್ ಇಂಗ್ಲೆಂಡ್ ಸೆಮಿಫೈನಲ್ ಅಸೆ ಬಹುತೇಕ ಕಮರಿದೆ. ಎರಡು ಅಂಕ ಗಳಿಸಿರುವ ಇಂಗ್ಲೆಂಡ್ ಕೊನೆಯ ಸ್ಥಾನದಲ್ಲಿದೆ. ಭಾರತ ನೀಡಿದ 230 ರನ್ ಗುರಿ ಬೆನ್ನತ್ತಿದ್ದ ಇಂಗ್ಲೆಂಡ್‌ಗೆ ಜಸ್ಪ್ರೀತ್ ಬುಮ್ರಾ ಹಾಗೂ ಮಹಮ್ಮದ್ ಶಮಿ ನೀಡಿದ ಭಾರೀ ಹೊಡೆತಕ್ಕೆ
ನಲುಗಿ ಹೋದರು. ಪೆವಿಲಿಯನ್‌ಗೆ ಫೆರೇಡ್ ನಡೆಸಿದ ಇಂಗ್ಲೆಂಡ್ 34.5 ಓವರ್ಗಳಲ್ಲಿ 129 ರನ್‌ಗೆ ಆಲ್ ಔಟ್ ಆಯಿತು.
27 ರನ್ ಗಳಿಸಿದ ಲಿಯಾಮ್ ಲಿವಿಂಗ್‌ಸ್ಟನ್ ಟಾಪ್ ಸ್ಕೋರರ್ ಆದರು. ಜಾನಿ ಬೆಯರ್‌ಸ್ಟೋ 14, ಡೇವಿಡ್ ಮಿಲಾನ್ 16, ಜೋಸ್ ಬಟ್ಲರ್ 10, ಮೊಯಿನ್ ಅಲಿ 15, ಡೇವಿಡ್ ವಿಲ್ಲಿ 16, ಆದಿಲ್ ರಶೀದ್ 13 ರನ್ ಗಳಿಸಿದರು.ಭಾರತದ ಪರ ಜಸ್ಪ್ರೀತ್ ಬುಮ್ರಾ 3, ಮಹಮ್ಮದ್ ಶಮಿ 4, ಕುಲ್‌ದೀಪ್ ಯಾದವ್ 2, ರವೀಂದ್ರ ಜಡೇಜ 1 ವಿಕೆಟ್ ಉರುಳಿಸಿದರು.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ 50 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 229 ರನ್ ಗಳಿಸಿತ್ತು.ಇಂಗ್ಲೆಂಡ್ ಬೌಲರ್‌ಗಳ ಬಿಗು ದಾಳಿಗೆ ಕುಸಿತ ಭಾರತದ ಬ್ಯಾಟರ್‌‌ಗಳು ರನ್ ಗಳಿಸಲು ಪರದಾಡಿದರು. ಜವಾಬ್ದಾರಿಯುತ ಆಟ ಆಡಿದ ರೋಹಿತ್ ಶರ್ಮ 101 ಎಸೆತಗಳಲ್ಲಿ 10 ಬೌಂಡರಿ ಹಾಗೂ 3 ಸಿಕ್ಸರ್ ನೆರವಿನಿಂದ 87 ರನ್ ಗಳಿಸಿದರು.
ಸೂರ್ಯಕುಮಾರ್ ಯಾದವ್ 47 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 1 ಸಿಕ್ಸರ್ ನೆರವಿನಿಂದ ಬಿರುಸಿನ 49 ರನ್ ಗಳಿಸಿ ಅರ್ಧ ಶತಕದ ಹೊಸ್ತಿಲಲ್ಲಿ ಎಡವಿದರು. ಕೆ.ಎಲ್.ರಾಹುಲ್ 58 ಎಸೆತಗಳಲ್ಲಿ 3 ಬೌಂಡರಿ ಸಹೀತ 39 ರನ್ ಗಳಿಸಿದರು. 40 ರನ್‌ಗೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಭಾರತಕ್ಕೆ ರೋಹಿತ್ ಶರ್ಮ ಹಾಗೂ ಕೆ.ಎಲ್.ರಾಹುಲ್ 4ನೇ ವಿಕೆಟ್‌ಗೆ 91 ರನ್ ಜೊತೆಯಾಟ ನೀಡಿ ಅಲ್ಪ ಚೇತರಿಕೆ ನೀಡಿದರು.
ಶುಭ್‌ಮನ್ ಗಿಲ್(9), ವಿರಾಟ್ ಕೊಹ್ಲಿ(0), ಶ್ರೇಯಸ್ ಅಯ್ಯರ್(4), ರವೀಂದ್ರ ಜಡೇಜ(8), ಮಹಮ್ಮದ್ ಶಮಿ(1) ಬೇಗನೇ ವಿಕೆಟ್ ಕೈ ಚೆಲ್ಲಿದರು. ಕೊನೆಯಲ್ಲಿ ಜಸ್ಪ್ರೀತ್ ಬುಮ್ರಾ(16) ಕುಲ್‌ದೀಪ್ ಯಾದವ್ (ಅಜೇಯ 9) ಸ್ಕೋರ್ ಅಲ್ಪ ಏರಿಸಿದರು.
ಇಂಗ್ಲೆಂಡ್ ಪರ ಡೇವಿಡ್ ವಿಲ್ಲಿ 3 ವಿಕೆಟ್, ಕ್ರಿಸ್ ವೋಕ್ಸ್, ಆದಿಲ್ ರಶೀದ್ ತಲಾ 2 ವಿಕೆಟ್ ಹಾಗೂ ಮಾರ್ಕ್ ವುಟ್ ಒಂದು ವಿಕೆಟ್ ಪಡೆದರು.
