ಮಂಗಳೂರು:ಈ ಬಾರಿ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ವಾಡಿಕೆಗಿಂತ ನಾಲ್ಕು ಪಟ್ಟು ಹೆಚ್ಚು ಮಳೆ ಸುರಿದಿದೆ.ವಾಡಿಕೆಗಿಂತ ಎಂಟು ದಿನ ಮೊದಲೇ ಮುಂಗಾರು ಮಳೆ ಆರಂಭವಾಗಿದೆ. ಜನವರಿಯಿಂದ ಮೇ ಅಂತ್ಯದ ವರೆಗೆ ಜಿಲ್ಲೆಯಲ್ಲಿ ಸಾಮಾನ್ಯವಾಗಿ 253.2 ಮಿಲಿ ಮೀಟರ್ ಮಳೆಯಾಗುತ್ತದೆ. ಈ ಬಾರಿ ಇದರ ಪ್ರಮಾಣ 1101.6 ಮಿಮೀ ಆಗಿದೆ.ಮೂಡುಬಿದಿರೆ, ಬೆಳ್ತಂಗಡಿ, ಕಡಬ, ಸುಳ್ಯ ಮತ್ತು ಪುತ್ತೂರು ತಾಲ್ಲೂಕುಗಳಲ್ಲಿ
ಹೆಚ್ಚು ಮಳೆಯಾಗಿದೆ. ಮಂಗಳೂರಿನಲ್ಲಿ ಈ ಅವಧಿಯಲ್ಲಿ ಕಡಿಮೆ ಮಳೆ ಸುರಿದಿದೆ. ಮೂಡುಬಿದಿರೆ ತಾಲೂಕಿನಲ್ಲಿ 1193.3 ಮಿಮೀ ಮಳೆಯಾಗಿದೆ. ಜನವರಿಯಿಂದ ಮೇ ವರೆಗೆ ಇಲ್ಲಿ ಸಾಮಾನ್ಯವಾಗಿ 230.4 ಮಿಮೀ ಮಳೆಯಾಗುವುದು ವಾಡಿಕೆ. ಕಡಬ ತಾಲ್ಲೂಕಿನಲ್ಲಿ 1145.7 ಮಿಮೀ (ವಾಡಿಕೆ: 292.5ಮಿಮೀ) ಬೆಳ್ತಂಗಡಿ ತಾಲ್ಲೂಕಿನಲ್ಲಿ 1149.1 ಮಿಮೀ (236.9ಮಿಮೀ), ಬಂಟ್ವಾಳ ತಾಲ್ಲೂಕಿನಲ್ಲಿ 1116.8 ಮಿಮೀ (230.7ಮಿಮೀ) ಮಳೆಯಾಗಿದೆ.
ಸುಳ್ಯದಲ್ಲಿ 1035.3 ಮಿಮೀ (254ಮಿಮೀ) ಪುತ್ತೂರಿನಲ್ಲಿ 1107.3 (228.1ಮಿಮೀ), ಉಳ್ಳಾಲದಲ್ಲಿ 1057.7ಮಿಮೀ (285.2ಮಿಮೀ), ಮೂಲ್ಕಿಯಲ್ಲಿ 984.5 ಮಿಮೀ (228.6ಮಿಮೀ) ಮತ್ತು ಮಂಗಳೂರಿನಲ್ಲಿ 909.8ಮಿಮೀ (284.9ಮಿಮೀ) ಮಳೆ ದಾಖಲಾಗಿದೆ.
ಸಾಮಾನ್ಯವಾಗಿ ಮುಂಗಾರು ಆರಂಭವಾಗುವ ಜೂನ್ ಒಂದರಂದು ಈ ಬಾರಿ ಮಳೆಯ ಅಬ್ಬರ ತಗ್ಗಿದೆ. ಜಿಲ್ಲೆಯಲ್ಲಿ ಭಾನುವಾರ ಬಿಟ್ಟುಬಿಟ್ಟು ಮಳೆಯಾಗಿದೆ.
