ನಾಟಿಂಗ್ಹ್ಯಾಮ್: ಆರಂಭ ಆಟಗಾರ ಫಿಲ್ ಸಾಲ್ಟ್ ಅವರ ಅಮೋಘ ಅರ್ಧಶತಕ ಹಾಗೂ ಆಲ್ರೌಂಡರ್ ಸ್ಯಾಮ್ ಕರನ್ ಅವರ ಬಿರುಸಿನ ಬ್ಯಾಟಿಂಗ್ ಬಲದಿಂದ ಇಂಗ್ಲೆಂಡ್ ತಂಡವು ಮೂರನೇ ಟಿ20 ಪಂದ್ಯದಲ್ಲಿ ಭಾರತವನ್ನು ಭಾರೀ ಅಂತರದಲ್ಲಿ ಮಣಿಸಿತು.ಟ್ರೆಂಟ್ ಬ್ರಿಜ್ ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ ಪಂದ್ಯದಲ್ಲಿ ಮೊದಲು
ಬ್ಯಾಟ್ ಮಾಡಿದ ಇಂಗ್ಲೆಂಡ್ ತಂಡವು ಭಾರತಕ್ಕೆ 202 ರನ್ಗಳ ಕಠಿಣ ಗುರಿ ನೀಡಿತು. ಆದರೆ ಭಾರತ 11.4 ಓವರ್ನಲ್ಲಿ 76 ರನ್ಗಳಿಗೆ ಸರ್ವಪತನವಾಗಿ 125 ರನ್ ಅಂತರದಲ್ಲಿ ಸೋಲನುಭವಿಸಿತು.
ಬ್ಯಾಟಿಂಗ್ಗೆ ಇಳಿಸಲ್ಪಟ್ಟ ಇಂಗ್ಲೆಂಡ್ ತಂಡಕ್ಕೆ ಸಾಲ್ಟ್ (70; 44ಎ) ಹಾಗೂ ಜೋಸ್ ಬಟ್ಲರ್ (36; 21ಎ) ಉತ್ತಮ ಆರಂಭ ಒದಗಿಸಿದರು. ಆರಂಭದಲ್ಲಿ ನಿಧಾನವಾಗಿ ಆಡಿದ ಅವರು 36 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ನಂತರ, ನಿಯಮಿತವಾಗಿ ಬೌಂಡರಿ ಮತ್ತು ಸಿಕ್ಸರ್ ಗಳಿಸುತ್ತಾ ರನ್ ವೇಗ ಹೆಚ್ಚಿಸಿದರು. ಕೊನೆಯಲ್ಲಿ ಕರನ್ (ಔಟಾಗದೇ 41; 24ಎ) ಬೀಸಾಟವಾಡಿ ತಂಡವನ್ನು 200ರ ಗಡಿ ದಾಟಿಸಿದರು.
ಇಂಗ್ಲೆಂಡ್ ಬ್ಯಾಟರ್ಗಳು ಕೊನೆಯ ಎಂಟು ಓವರ್ಗಳಲ್ಲಿ 89 ರನ್ ಸೂರೆ ಮಾಡಿದರು. ಇಂಗ್ಲೆಂಡ್ ನಿಗದಿತ ಓವರ್ಗಳಲ್ಲಿ 7 ವಿಕೆಟ್ಗೆ 201 ರನ್ಗಳ ದೊಡ್ಡ ಮೊತ್ತ ಗಳಿಸಿತು. ಸ್ಪಿನ್ನರ್ ರವಿ ಬಿಷ್ಣೋಯಿ ಬದಲಿಗೆ ಸ್ಥಾನ ಪಡೆದ ಯುವ ವೇಗಿ ಪ್ರಿನ್ಸ್ ಯಾದವ್ (30ಕ್ಕೆ2) ಹಾಗೂ ಹರ್ಷಿತ್ ರಾಣಾ (40ಕ್ಕೆ2) ವಿಕೆಟ್ ಪಡೆದರು.
ಭಾರತದ ಪರ ಸೂರ್ಯವಂಶಿ, ಕಿಶನ್ ಕೇವಲ ತಲಾ 13 ರನ್ಗಳಿದರೆ, ಅಭಿಷೇಕ್ ಶರ್ಮಾ, ಅಕ್ಷರ್ ತಲಾ 10 ಗಳಿಸಿದರು. ಉಳಿದಂತೆ ಯಾರೂ ಕೂಡ ಎರಡಂಕಿ ದಾಖಲಿಲ್ಲ.
