ಸುಳ್ಯ:ತಾಲೂಕಿನ ವಿವಿಧ ಕಡೆ ವ್ಯಾಪಕವಾಗಿ ಪವರ್‌ಮೆನ್‌ಗಳ ಕೊರತೆ ಕಾಡುತ್ತಿರುವ ಬಗ್ಗೆ ಸುಳ್ಯ ತಾಲೂಕು ಪಂಚಾಯತ್ ಸಭಾಂಗಣದಲ್ಲಿ ಶುಕ್ರವಾರ ನಡೆದ ಸುಳ್ಯ ಮತ್ತು ಸುಬ್ರಹ್ಮಣ್ಯ ಉಪ ವಿಭಾಗ ಮಟ್ಟದ ಮೆಸ್ಕಾಂ ಜನ ಸಂಪರ್ಕ ಸಭೆಯಲ್ಲಿ ವ್ಯಾಪಕ ಚರ್ಚೆ ನಡೆಯಿತು. ಮೆಸ್ಕಾಂ ಅಧೀಕ್ಷಕ ಇಂಜಿನಿಯರ್ ಕೃಷ್ಣರಾಜ್ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಹಲವು
ಮಂದಿ ಪ್ರಮುಖರು ವಿಷಯ ಪ್ರಸ್ತಾಪಿಸಿದರು.ಮಾಜಿ ಜಿ.ಪಂ. ಸದಸ್ಯ ಹರೀಶ್ ಕಂಜಿಪಿಲಿ ಮಾತನಾಡಿ ತಾಲೂಕಿನ ಬಹುತೇಕ ಗ್ರಾಮೀಣ ಪ್ರದೇಶಗಳಾದ ಮರ್ಕಂಜ, ಬೊಳ್ಳಾಜೆ ಮುಂತಾದ ಪ್ರದೇಶಗಳಿಗೆ ಪವರ್‌ಮೆನ್‌ಗಳಿಲ್ಲದೇ ಸಮಸ್ಯೆಗಳಾಗುತ್ತಿದೆ. ತಾಲೂಕಿನ ರೈತರು ಮೊದಲೇ ಸಂಕಷ್ಟದಲ್ಲಿದ್ದಾರೆ.ಇನ್ನೂ ಕೃಷಿ ತೋಟಗಳಿಗೆ ನೀರು ಹಾಯಿಸಲು ಆರಂಭವಾದಾಗ ಸಮಸ್ಯೆಗಳಾಗುತ್ತದೆ. ಸಮಸ್ಯೆ ಇರುವ ಕಡೆ ಮೊದಲ ಆದ್ಯತೆಯಲ್ಲಿ ಪವರ್‌ಮೆನ್‌ಗಳನ್ನು ನೀಡಬೇಕು ಎಂದು ಹೇಳಿದರು.ದಿನೇಶ್ ಸರಸ್ವತಿ ಮಹಲ್ ತಾಲೂಕಿನ
ಗುತ್ತಿಗಾರು,ಅರಂತೋಡು ಸೇರಿದಂತೆ ತಾಲೂಕಿನ ಬಹುತೇಕ ಕಡೆ ಅಗತ್ಯಕ್ಕೆ ತಕ್ಕಂತೆ ಪವರ್‌ಮೆನ್‌ಗಳಿಲ್ಲದೇ ವಿದ್ಯುತ್ ಸಮಸ್ಯೆ ವ್ಯಾಪಕವಾಗಿದೆ. ಕೂಡಲೇ ಪವರ್‌ಮೆನ್‌ಗಳನ್ನು ನೀಡಬೇಕು ಎಂದು ಆಗ್ರಹಿಸಿದರ. ಗ್ಯಾರಂಟಿ ಸಮಿತಿ ಸದಸ್ಯ ಮುಸ್ತಫ ಬೆಳ್ಳಾರೆ ಮಾತನಾಡಿ ಬೆಳ್ಳಾರೆ, ಐವರ್ನಾಡು, ಚೊಕ್ಕಾಡಿ ಭಾಗದಲ್ಲಿ ಪವರ್‌ಮೆನ್‌ಗಳ ಸಮಸ್ಯೆ ಇದೆ. ಬೆಳ್ಳಾರೆಯಲ್ಲಿ ಮೆಸ್ಕಾಂ ಉಪವಿಭಾಗ ಅಗತ್ಯ ಇದೆ ಎಂದು ತಿಳಿಸಿದರು.
ಇದಕ್ಕೆ ಉತ್ತರಿಸಿದ ಅಧೀಕ್ಷಕ ಇಂಜಿನಿಯರ್ ಕೃಷ್ಣರಾಜ್ ಜಿಲ್ಲೆಯಲ್ಲಿಯೇ ಪವರ್‌ಮೆನ್‌ಗಳ ಕೊರತೆ ಇದೆ. ಪವರ್‌ಮೆನ್‌ಗಳ ನೇಮಕಕ್ಕೆ ಬೇಡಿಕೆ ಸಲ್ಲಿಸಲಾಗಿದೆ. ಹೊಸ ನೇಮಕಾತಿ ಆಗುವ ವರೆಗೂ ಈಗ ಇದ್ದವರನ್ನೇ ಮುಂದುವರಿಸಲಾಗುವುದು. ಸಮಸ್ಯೆ ಇರುವ ಕಡೆ ತಾತ್ಕಾಲಿಕ ಖಾಸಾಗಿ ವ್ಯಕ್ತಿಗಳನ್ನು ನೇಮಿಸಿಕೊಳ್ಳುವಂತೆ ಸೂಚನೆ ನೀಡಿದರು.
ಲೋಲಜಾಕ್ಷ ಭೂತಕಲ್ಲು ಮಾತನಾಡಿ ಸುಳ್ಯದಿಂದ ಆಲೆಟ್ಟಿ ಕಡೆಗೆ ಹೋಗುವ ವಿದ್ಯುತ್ ಲೈನ್ ಸುಮಾರು 30ವರ್ಷದ ಹಳೆಯದು.ಇದರಿಂದ ವಿದ್ಯುತ್ ತಂತಿಗಳು ಜೋತು ಬಿದ್ದುಕೊಂಡು ಹಲವು ಕಡೆ ಅಪಾಯವನ್ನು ಸೂಚಿಸುತ್ತಿದೆ. ಹಲವು ಬಾರಿ ಮನವಿ ಮಾಡಿದರೂ ಪ್ರಯೋಜನ ಆಗಿಲ್ಲ. ಕೂಡಲೇ ತಂತಿಗಳನ್ನು ಬದಲಾವಣೆ ಮಾಡಬೇಕು. ಅವಶ್ಯ ಇರುವ ಕಡೆ ಕಂಬ ಮತ್ತು ಟಿಸಿಗಳನ್ನು ಅಳವಡಿಕೆ ಮಾಡಬೇಕು ಎಂದು ಹೇಳಿದರು.ಸಮಸ್ಯೆ ಇರುವ ಕಡೆ ಕಂಬಗಳನ್ನು ಹಾಕಿ ವಿದ್ಯುತ್ ತಂತಿಗಳನ್ನು ಸರಿಪಡಿಸಲು ಅಧೀಕ್ಷಕ ಇಂಜಿನಿಯರ್ ಮೆಸ್ಕಾಂ ಅಧಿಕಾರಿಗಳಿಗೆ ಸೂಚನೆ ನೀಡಿದರು.
ವಿನಯ ಕುಮಾರ್ ಕಂದಡ್ಕ ಮಾತನಾಡಿ ಸುಳ್ಯಕ್ಕೆ ವಿದ್ಯುತ್ ಸಮಸ್ಯೆ ಆಗಬಾರದು ಎನ್ನುವ ನಿಟ್ಟಿನಲ್ಲಿ ಬೆಳ್ಳಾರೆಯಿಂದ ಸುಳ್ಯಕ್ಕೆ ಅಂಡರ್ ಗ್ರೌಂಡ್ ಯುಜಿ ಕೇಬಲ್‌ನ್ನು ಕೋಟ್ಯಾಂತರ ರೂಪಾಯಿಯಲ್ಲಿ ಆಳವಡಿಸಲಾಗಿದೆ. ಆದರೆ ಅಲ್ಲೂ ಸಮಸ್ಯೆ ಆಗಿದೆ ಎಂದರು.ಇದಕ್ಕೆ ಉತ್ತರಿಸಿದ ಅಧೀಕ್ಷಕ ಇಂಜಿನಿಯರ್ ಯುಜಿ ಕೇಬಲ್‌ನಲ್ಲಿ ಸಣ್ಣ ಪ್ರಮಾಣದ ಸಮಸ್ಯೆ ಕಂಡು ಬಂದಿದೆ. ಸಮಸ್ಯೆ ಪರಿಹರಿಸಲಾಗುವುದು ಎಂದು ಹೇಳಿದರು.
ಸಭೆಯಲ್ಲಿ ರಮೇಶ್ ಕೋಟೆ, ಗೋಕುಲ್‌ದಾಸ್, ಅಬೂಬಕ್ಕರ್ ಅರಫ,ಆನಂದ ಬೆಳ್ಳಾರೆ ನಂದರಾಜ್ ಸತ್ಯಕುಮಾರ್ ಆಡಿಂಜ,ತೀರ್ಥರಾಮ ಪರ್ನೋಜಿ, ಸಂತೋಷ್ ಕುತ್ತಮೊಟ್ಟೆ, ಸುದರ್ಶನ್ ಪಾತಿಕಲ್ಲು, ಜುನೈದ್ ಅಡ್ಕಾರ್ ಮೊದಲಾದವರು ಮಾತನಾಡಿದರು.
ವೇದಿಕೆಯಲ್ಲಿ ತಾಲೂಕು ಗ್ಯಾರಂಟಿ ಅನುಷ್ಠಾನ ಸಮಿತಿ ಅಧ್ಯಕ್ಷ ಪಿ.ಎಸ್.ಗಂಗಾಧರ, ಮೆಸ್ಕ ಪುತ್ತೂರು ವಿಭಾಗದ ಕಾರ್ಯನಿರ್ವಾಹಕ ಇಂಜಿನಿಯರ್ ರಾಮಚಂದ್ರ. ಎ, ಸುಳ್ಯ ಉಪ ವಿಭಾಗದ ಸಹಾಯಕ ಕಾರ್ಯನಿರ್ವಹಕ ಇಂಜಿನಿಯರ್ ಹರೀಶ್ ನಾಯ್ಕ್, ಸುಬ್ರಹ್ಮಣ್ಯ ಉಪ ವಿಭಾಗದ ಸಹಾಯಕ ಕಾರ್ಯನಿರ್ವಾಹಕ ಇಂಜಿನಿಯರ್ ಸತೀಶ್ ಸಫಲ್ಯ ಉಪಸ್ಥಿತರಿದ್ದರು.ಸಭೆಯಲ್ಲಿ ಸಹಾಯಕ ಇಂಜಿನಿಯರ್‌ಗಳಾದ ಹರಿಕೃಷ್ಣ ಕೆ.ಜಿ., ಸುಪ್ರೀತ್ ಕುಮಾರ್ ಎಸ್, ಚಿದಾನಂದ. ಕೆ, ಪ್ರಸಾದ್. ಕೆ.ವಿ, ಮಹೇಶ್. ಕೆ ಮತ್ತು ಸಿಬ್ಬಂದಿಗಳು ಉಪಸ್ಥಿತರಿದ್ದರು.
