ಚೆನ್ನೈ: ನಾಯಕ ನಿತಿಶ್ ರಾಣಾ(ಔಟಾಗದೆ 57 ರನ್) ಹಾಗೂ ರಿಂಕು ಸಿಂಗ್(54 ರನ್)ಅರ್ಧಶತಕಗಳ ನೆರವಿನಿಂದ ಕೋಲ್ಕತಾ ನೈಟ್ ರೈಡರ್ಸ್ ತಂಡ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಐಪಿಎಲ್ ಪಂದ್ಯದಲ್ಲಿ 6 ವಿಕೆಟ್‌ಗಳ ಅಂತರದಿಂದ ಗೆಲುವು ದಾಖಲಿಸಿದೆ.ರವಿವಾರ ನಡೆದ ಪಂದ್ಯದಲ್ಲಿ ಗೆಲ್ಲಲು 145 ರನ್ ಗುರಿ ಪಡೆದ ಕೆಕೆಆರ್ 18.3 ಓವರ್‌ಗಳಲ್ಲಿ
4 ವಿಕೆಟ್‌ಗಳ ನಷ್ಟಕ್ಕೆ 147 ರನ್ ಗಳಿಸಿತು. ಚೆನ್ನೈ ಪರ ದೀಪಕ್ ಚಹಾರ್(3-27)ಯಶಸ್ವಿ ಬೌಲರ್ ಎನಿಸಿಕೊಂಡರು. ರಾಣಾ ಹಾಗೂ ರಿಂಕಿ ಸಿಂಗ್ 4ನೇ ವಿಕೆಟ್‌ಗೆ 99 ರನ್ ಜೊತೆಯಾಟ ನಡೆಸಿ ಇನ್ನೂ 9 ಎಸೆತ ಬಾಕಿ ಇರುವಾಗಲೇ ತಂಡಕ್ಕೆ ಗೆಲುವು ತಂದುಕೊಟ್ಟರು. ಟಾಸ್ ಜಯಿಸಿ ಮೊದಲು ಬ್ಯಾಟಿಂಗ್ ಮಾಡಿದ ಚೆನ್ನೈ ತಂಡ ಆಲ್‌ರೌಂಡರ್ ಶಿವಂ ದುಬೆ(ಔಟಾಗದೆ 48 ರನ್)ಏಕಾಂಗಿ ಹೋರಾಟದ ನೆರವಿನಿಂದ 20 ಓವರ್‌ಗಳಲ್ಲಿ 6 ವಿಕೆಟ್‌ಗಳ ನಷ್ಟಕ್ಕೆ 144 ರನ್ ಗಳಿಸಿತು.ಕೆಕೆಆರ್‌ನ ಸ್ಪಿನ್ ಬೌಲರ್‌ಗಳಾದ ಸುನೀಲ್ ನರೇನ್(2-15) ಹಾಗೂ ವರುಣ್ ಚಕ್ರವರ್ತಿ(2-36)ತಲಾ ಎರಡು ವಿಕೆಟ್‌ಗಳನ್ನು ಪಡೆದು ಚೆನ್ನೈ ತಂಡವನ್ನು 150ರೊಳಗೆ ನಿಯಂತಿಸುವಲ್ಲಿ ಸಫಲರಾದರು.ಚೆನ್ನೈ ಪರ ಅಗ್ರ ಕ್ರಮಾಂಕದಲ್ಲಿ ಡೆವೊನ್ ಕಾನ್ವೆ(30 ರನ್), ರವೀಂದ್ರ ಜಡೇಜ(20 ರನ್), ಋತುರಾಜ್ ಗಾಯಕ್ವಾಡ್(17 ರನ್) ಹಾಗೂ ಅಜಿಂಕ್ಯ ರಹಾನೆ(16 ರನ್)ಎರಡಂಕೆಯ ಸ್ಕೋರ್ ಗಳಿಸಿದರು.
