*ಗಂಗಾಧರ ಕಲ್ಲಪಳ್ಳಿ.
ಸುಳ್ಯ:ಅಮರ ಸುಳ್ಯ ದಂಗೆಯ ರುವಾರಿ ಕೆದಂಬಾಡಿ ರಾಮಯ್ಯ ಗೌಡರ ಊರು ಉಬರಡ್ಕ ಮಿತ್ತೂರು ಗ್ರಾಮದ ಅಮೈ ಮಡಿಯಾರು ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಆವರಣ ಗೋಡೆಯಲ್ಲಿ ಈ ಚಾರಿತ್ರಿಕ ಘಟನೆಯು ಶಿಲ್ಪಗಳಾಗಿ ಅರಳಿವೆ. ಉಬ್ಬು ಶಿಲ್ಪಗಳು ರಚಿಸುವ ಕೆಲಸ ಮುಗಿದಿದ್ದು ಅಂತಿಮ ಹಂತದ ಕುಸುರಿ ಕೆಲಸ ಬಣ್ಣ ಹಚ್ಚುವ ಕೆಲಸಗಳು ಉಳಿದಿದೆ. ಕೆಲವೇ ದಿನಗಳಲ್ಲಿ ಚಾರಿತ್ರಿಕ ಘಟನೆಯೊಂದು ಉಬ್ಬು ಶಿಲ್ಪಗಳಾಗಿ ಮನ ಸೂರೆಗೊಳ್ಳಲಿದೆ.
1837ರಲ್ಲಿ ಬ್ರಿಟೀಷರ ವಿರುದ್ಧ ನಡೆದ ಸ್ವಾತಂತ್ರ್ಯ ಹೋರಾಟ ಅಮರ ಸುಳ್ಯ ಕ್ರಾಂತಿಯ ಕುರಿತಾದ ಚರಿತ್ರೆಗಳನ್ನು ಹಲವು ಮಂದಿ ಲೇಖಕರು, ಇತಿಹಾಸಕಾರರು ಸಂಶೋಧನೆ ನಡೆಸಿ ವಿವಿರವಾಗಿ ಪುಸ್ತಕ ರೂಪದಲ್ಲಿ
ದಾಖಲಿಸಿದ್ದಾರೆ.ಈ ಸ್ವಾತಂತ್ರ್ಯ ಹೋರಾಟದ ಚರಿತ್ರೆಯು ಸಾರ್ವಜನಿಕರಿಗೆ, ವಿದ್ಯಾರ್ಥಿಗಳಿಗೆ ಸುಲಭವಾಗಿ ಅರ್ಥವಾಗಬೇಕು ಎಂಬ ನೆಲೆಯಲ್ಲಿ ಈ ಇತಿಹಾಸದ ಸಾಲುಗಳನ್ನು ಉಬ್ಬು ಶಿಲ್ಪದ ಮೂಲಕ ದಾಖಲಿಸುವ ಪ್ರಯತ್ನ ನಡೆಸಲಾಗಿದೆ. ಉಬರಡ್ಕ ಮಿತ್ತೂರಿನ ಮದುವೆಗದ್ದೆ ದಾಮೋದರ ಗೌಡರ ನೇತೃತ್ವದಲ್ಲಿ ಕಾರ್ಯಾಚರಿಸುತ್ತಿರುವ ‘ಜ್ಞಾನಧಾಮ ಚಾರಿಟೇಬಲ್ ಟ್ರಸ್ಟ್’ ಊರ ಜನರ ಸಹಕಾರದಿಂದ ಶಾಲೆಯ ಸರ್ವತೋಮುಖ ಅಭಿವೃದ್ಧಿಗೆ ಪ್ರಯತ್ನ ನಡೆಸುತಿದೆ. ಅದರ ಭಾಗವಾಗಿ ಶಾಲೆಗೆ ದ್ವಾರ ಮತ್ತಿತರ ಅಭಿವೃದ್ಧಿ ನಡೆಸಲಾಗಿದ್ದು ಇಲ್ಲಿ ಇನ್ನಷ್ಟು ಆಕರ್ಷಕವಾಗಬೇಕು ಎಂಬ ನೆಲೆಯಲ್ಲಿ ಶಾಲೆಯ ಆವರಣ ಗೋಡೆಯಲ್ಲಿ ಸಿಮೆಂಟಿನ ಉಬ್ಬು ಚಿತ್ರಗಳನ್ನು ರಚಿಸಲಾಗಿದೆ.ಇತ್ತೀಚೆಗೆ ಬಿಡುಗಡೆಗೊಂಡ ಸಾಹಿತಿ ಕೆ. ಆರ್.ವಿದ್ಯಾಧರ ಕುಡೆಕಲ್ಲು ಅವರ ” ಅಮರಸುಳ್ಯ 1837 ಸಶಸ್ತ್ರ ಹೋರಾಟ ” ಕೃತಿಯನ್ನಾಧರಿಸಿ ಹಿರಿಯ ಸಾಹಿತಿ ,ಚಿತ್ರಕಾರ ಎ.ಕೆ ಹಿಮಕರ ಅವರು ರಚಿಸಿದ ರೇಖಾಚಿತ್ರದ ಆಧಾರದಲ್ಲಿ
ಉಬ್ಬುಶಿಲ್ಪ ಕಲಾವಿದರಾದ ಕಾಸರಗೋಡು ಜಿಲ್ಲೆಯ ಮಹೇಶ ಬಾಯಾರು ಸಿಮೆಂಟಿನಲ್ಲಿ ಉಬ್ಬು ಶಿಲ್ಪಗಳನ್ನು ರಚಿಸಿದ್ದಾರೆ.
ಅತ್ಯಂತ ಸರಳವಾಗಿ ಈ ಘಟನೆಯ ಕುರಿತು ಬೆಳಕು ಚೆಲ್ಲುವ 14 ಶಿಲ್ಪಗಳು ರಚನೆಯಾಗಿದೆ. ಎ.ಕೆ. ಹಿಮಕರ ಅವರ ಕಲ್ಪನೆಯ ಚಿತ್ರಕ್ಕೆ ಶಿಲ್ಪಿ ಮಹೇಶ್ ಬಾಯಾರು ಮೂರ್ತರೂಪ ನೀಡಿದ್ದಾರೆ. ಶಿಲ್ಪಗಳು ಈಗಾಗಲೇ ರಚನೆಯಾಗಿದೆ. ಮಡಿಕೇರಿಯ ಅರಮನೆಯಿಂದ ಬ್ರಿಟೀಷರು ಕೊನೆಯ ಅರಸನನ್ನು ಅರಮನೆಯಿಂದ ಹೊರಗಟ್ಟುವ ದೃಶ್ಯ, ಕೆದಂಬಾಡಿಗೆ ಪುಟ್ಟ ಬಸವನನ್ನು ಕರೆತರುವ, ಪೂಮಲೆ ಕಾಡಿನಲ್ಲಿ ಸಮಾಲೋಚನೆ, ಆಶ್ರಮ ಕಟ್ಟಿ ಪುಟ್ಟ ಬಸವನನ್ನು ಕಲ್ಯಾಣ ಸ್ವಾಮಿಯಾಗಿ ಮಾರ್ಪಾಡು ಮಾಡುವ, ಮದುವೆಗದ್ದೆಯಿಂದ ದಂಡು ಹೊರಡುವ, ಸೈನಿಕರ ಜಮಾವಣೆ, ಬೆಳ್ಳಾರೆ ಕೋಟೆ ಸ್ವಾಧೀನಪಡಿಸುವ, ಅಟ್ಲೂರು ರಾಮಪ್ಪಯ್ಯನಿಗೆ ಮರಣದಂಡನೆ ವಿಧಿಸುವ, ಮಂಗಳೂರು ಕೋಟೆ ಸ್ವಾಧೀನಪಡಿಸಿ ಧ್ವಜಾರೋಹಣ ಮಾಡುವ, ಕಲ್ಯಾಣ ಸ್ವಾಮಿ ಮತ್ತಿತರರನ್ನು ಗಲ್ಲಿಗೇರಿಸುವ, ಹೋರಾಟಗಾರರನ್ನು ಹಡಗಿನಲ್ಲಿ ತುಂಬಿ ವಿದೇಶಕ್ಕೆ ಗಡಿ ಪಾರು ಮಾಡುವ.. ಹೀಗೆ ಅಮರ ಸುಳ್ಯ ದಂಗೆಯ ಪ್ರಮುಖ ಘಟನೆಗಳು ಶಿಲ್ಪದ ರೂಪದಲ್ಲಿ ಮೂಡಿ ಬಂದಿದೆ. ಆ ಮೂಲಕ ಅಮರ ಸುಳ್ಯ ಕ್ರಾಂತಿಯ ಇತಿಹಾಸವನ್ನು ತಿಳಿಸುವ ಪ್ರಯತ್ನ ಇದಾಗಿದೆ.
“ಇತಿಹಾಸವನ್ನು ಸುಲಭವಾಗಿ ಜನರಿಗೆ ಮುಟ್ಟಿಸುವ ಪ್ರಯತ್ನ ಇದು. ಅಮರ ಕ್ರಾಂತಿಯ ಬಗ್ಗೆ ಡಾ. ಪುರುಷೋತ್ತಮ ಬಿಳಿಮಲೆ, ಸಾಹಿತಿ ಅರವಿಂದ ಚೊಕ್ಕಾಡಿ ಹಾಗೂ ಕೆ.ಆರ್.ವಿದ್ಯಾಧರ ಕುಡೆಕಲ್ಲು ಇವರ ಪುಸ್ತಕಗಳು ಮತ್ತೆ ಇತಿಹಾಸಕಾರರ ಗಮನ ಪೂಮಲೆಯ ಸುತ್ತಕ್ಕೆ ಸೆಳೆದಿದೆ.
ಅದಲ್ಲದೇ ಸರಕಾರ ಈ ಹೋರಾಟದ ರೂವಾರಿ ಕೆದಂಬಾಡಿ ರಾಮಯ್ಯ ಗೌಡರ ಪ್ರತಿಮೆಯನ್ನು ಮಂಗಳೂರಿನ ಬಾವುಟ ಗುಡ್ಡೆಯಲ್ಲಿ ಸ್ಥಾಪಿಸಲಾಗುತಿದೆ. ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ಈ
ಸಂದರ್ಭದಲ್ಲಿ ಅಮರ ಸುಳ್ಯ ಕ್ರಾಂತಿ ಎಲ್ಲಡೆ ಚರ್ಚೆಯಗುತಿದೆ. ಇವೆಲ್ಲದರ ನಡುವೆ ಕೆದಂಬಾಡಿ ರಾಮಯ್ಯಗೌಡರ ಹುಟ್ಟೂರಿನಲ್ಲಿ ಶಿಲ್ಪಗಳಾಗಿ ಅರಳಿದೆ ಎನ್ನುತ್ತಾರೆ ಸಾಹಿತಿ ಎ.ಕೆ.ಹಿಮಕರ.ಚಿತ್ರಗಳು ಬಹುಬೇಗ ಮನಸ್ಸನ್ನು ಸೆಳೆಯುತ್ತದೆ. ಈ ಹಿನ್ನಲೆಯಲ್ಲಿ ಇಲ್ಲಿ ಚಾರಿತ್ರಿಕ ಘಟನೆಗಳು ಉಬ್ಬು ಶಿಲ್ಪಗಳಾಗಿ ಅರಳಿ ವಿದ್ಯಾರ್ಥಿಗಳಿಗೆ ಇತಿಹಾಸ ಹೇಳಿದಂತಾಗುತ್ತದೆ. ಎನ್ನುತ್ತಾರವರು.
