ಡರ್ಬನ್: ಸಂಜು ಸ್ಯಾಮ್ಸನ್ ಭರ್ಜರಿ ಶತಕ, ಸ್ಪಿನ್ನರ್‌ಗಳಾದ ವರುಣ್ ಚಕ್ರವರ್ತಿ ಮತ್ತು ರವಿ ಬಿಷ್ಣೋಯಿ ಕೈಚಳಕದ ನೆರವಿನಿಂದ ಭಾರತ ತಂಡವು ಶುಕ್ರವಾರ ದಕ್ಷಿಣ ಆಫ್ರಿಕಾ ಎದುರಿನ ಟಿ20 ಕ್ರಿಕೆಟ್ ಸರಣಿಯ ಮೊದಲ ಪಂದ್ಯದಲ್ಲಿ 61 ರನ್‌ಗಳಿಂದ ಜಯ ಸಾಧಿಸಿತು. ಸಂಜು ಅಬ್ಬರದ ಬ್ಯಾಟಿಂಗ್ (107; 50ಎಸೆತ) ಬಲದಿಂದ ಭಾರತ ತಂಡವು 20 ಓವರ್‌ಗಳಲ್ಲಿ 8 ವಿಕೆಟ್‌ಗಳಿಗೆ 202 ರನ್‌ಗಳ ದೊಡ್ಡ ಮೊತ್ತ ಗಳಿಸಿತು.
ಈ ಗುರಿಯನ್ನು ಬೆನ್ನತ್ತಿದ
ಆತಿಥೇಯ ತಂಡವು 17.5 ಓವರ್‌ಗಳಲ್ಲಿ 141 ರನ್ ಗಳಿಸಿ ಹೋರಾಟವನ್ನು ಮುಗಿಸಿತು. ಬೌಲರ್‌ ಗಳಾದ ಅರ್ಷದೀಪ್‌ ಸಿಂಗ್‌ ಮತ್ತು ಆವೇಶ್‌ ಖಾನ್‌ ಆರಂಭದಲ್ಲೇ ಪೆಟ್ಟು ನೀಡಿದರು. ಅವರು ಕ್ರಮವಾಗಿ ನಾಯಕ ಏಡನ್‌ ಮರ್ಕರಂ (6) ಮತ್ತು ಟ್ರಿಸ್ಟನ್ ಸ್ಟಬ್ಸ್‌ (11) ಅವರ ವಿಕೆಟ್ ಪಡೆದರು. ಹೀಗಾಗಿ 30 ರನ್ ಗಳಿಸುವಷ್ಟಲ್ಲಿ ದಕ್ಷಿಣ ಆಫ್ರಿಕಾ ಎರಡು ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಈ ಮಧ್ಯೆ ರಯಾನ್ ರಿಕೆಲ್ಟನ್ (21;11ಎ), ಹೆನ್ರಿಚ್‌ ಕ್ಲಾಸೆನ್‌ (25;22ಎ) ಮತ್ತು ಡೇವಿಡ್‌ ಮಿಲ್ಲರ್‌ (18;22ಎ) ತಂಡಕ್ಕೆ ಕೊಂಚ ಚೇತರಿಕೆ ನೀಡಿದರು. ಈ ಮೂವರೂ ವರುಣ್ ಅವರ ಸ್ಪಿನ್‌ ಬಲೆಗೆ ಬಿದ್ದರು. ಕೊನೆಯ ಹಂತದಲ್ಲಿ ಬಿಷ್ಣೋಯಿ ಕೈಚಳಕ ತೋರಿ, ಪ್ಯಾಟ್ರಿಕ್ ಕ್ರುಗರ್ (1), ಮಾರ್ಕೊ ಯಾನ್ಸೆನ್ (12) ಮತ್ತು ಆ್ಯಂಡಿಲೆ ಸಿಮೆಲೇನ್ (6) ಅವರ ವಿಕೆಟ್ ಪಡೆದರು. ಬೌಲಿಂಗ್‌ನಲ್ಲಿ ಮಿಂಚಿದ್ದ ಗೆರಾಲ್ಡ್ ಕೋಜಿ (23;11ಎ) ಬ್ಯಾಟಿಂಗ್‌ನಲ್ಲೂ ಗಮನ ಸೆಳೆದರು.ಇದಕ್ಕೂ ಮೊದಲು ಟಾಸ್‌ ಸೋತು ಬ್ಯಾಟಿಂಗ್‌ಗೆ ಇಳಿದ ಭಾರತ ತಂಡದ ಆರಂಭಿಕ ಆಟಗಾರ ಸಂಜು ಅಬ್ಬರಿಸಿದರು. ಅವರು 50 ಎಸೆತಗಳಲ್ಲಿ 10 ಸಿಕ್ಸರ್ 7 ಬೌಂಡರಿ ನೆರವಿನಿಂದ 107 ರನ್ ಚಚ್ಚಿದರು.ಟಿ20 ಮಾದರಿಯಲ್ಲಿ 29 ವರ್ಷದ ಸಂಜು ಗಳಿಸಿದ ಸತತ ಎರಡನೇ ಶತಕ ಇದಾಗಿದೆ.
ಸಂಜು ಮತ್ತು ಅಭಿಷೇಕ್ ಶರ್ಮಾ ಅವರು ಭಾರತಕ್ಕೆ ಅಬ್ಬರದ ಆರಂಭ ನೀಡಿದರು. ಕೇವಲ 3 ಓವರ್‌ಗಳಲ್ಲಿ 24 ರನ್ ಬಾಚಿದರು. ಆದರೆ ನಾಲ್ಕನೇ ಓವರ್‌ನಲ್ಲಿ ಅಭಿಷೇಕ್ ವಿಕೆಟ್ ಗಳಿಸುವಲ್ಲಿ ಗೆರಾಲ್ಡ್ ಕೋಜಿ ಯಶಸ್ವಿಯಾದರು. ಬಳಿಕ ಸಂಜು ಜೊತೆಗೂಡಿದ ನಾಯಕ ಸೂರ್ಯಕುಮಾರ್ ಯಾದವ್ (21; 17ಎ, 4X2, 6X1) ಎರಡನೇ ವಿಕೆಟ್ ಜೊತೆಯಾಟದಲ್ಲಿ 66 ರನ್ ಸೇರಿಸಲು ನೆರವಾದರು.ಆದರೆ ಸಂಜು ಆಟಕ್ಕೆ ಅಂಕುಶ ಹಾಕಲು ಯಾರಿಗೂ ಸಾಧ್ಯವಾಗಲಿಲ್ಲ. ಎಲ್ಲ ಬೌಲರ್‌ಗಳನ್ನು ಮನಬಂದಂತೆ ದಂಡಿಸಿದರು. ಪೀಟರ್ ಹಾಕಿದ ಎಂಟನೇ ಓವರ್‌ನಲ್ಲಿ ಸತತ ಎರಡು ಸಿಕ್ಸರ್ ಎತ್ತಿದ ಸಂಜು 50ರ ಗಡಿ ದಾಟಿದರು. 27 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು.ತಿಲಕ್ ವರ್ಮಾ ಜೊತೆಗೂ ಸಂಜು 3ನೇ ವಿಕೆಟ್‌ಗೆ 77 ರನ್ ಸೇರಿಸಿದರು. 16ನೇ ಓವರ್‌ನವರೆಗೂ ಅವರ ಅಬ್ಬರ ಮುಂದುವರಿಯಿತು. ಎನ್ಕಾಬೇಮ್ಜಿ ಪೀಟರ್ ಅವರ ಎಸೆತದಲ್ಲಿ ಸಂಜು ಅವರು ಟ್ರಿಸ್ಟನ್ ಸ್ಟಬ್ಸ್‌ಗೆ ಕ್ಯಾಚಿತ್ತರು.
ಇವರಿಗಿಂತ ಮುಂಚಿನ ಓವರ್‌ನಲ್ಲಿ ತಿಲಕ್ ವರ್ಮಾ (33; 18ಎ) ಅವರು ಕೇಶವ್ ಮಹಾರಾಜ ಅವರ ಎಸೆತವನ್ನು ಆಡಿ ಮಾರ್ಕೊ ಯಾನ್ಸೆನ್ ಅವರಿಗೆ ಕ್ಯಾಚಿತ್ತರು. ಈ ಗೆಲುವಿನೊಂದಿಗೆ ಭಾರತ ತಂಡವು ನಾಲ್ಕು ಪಂದ್ಯಗಳ ಸರಣಿಯಲ್ಲಿ 1–0 ಮುನ್ನಡೆ ಪಡೆದಿದೆ. ಭಾನುವಾರ ಎರಡನೇ ಪಂದ್ಯ ನಡೆಯಲಿದೆ.
