ಹೊಸದಿಲ್ಲಿ :ಐಸಿಸಿ ಏಕದಿನ ವಿಶ್ವಕಪ್ ಕ್ರಿಕೆಟ್ 2023 ಟೂರ್ನಿಯ ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ 102 ರನ್ ಗಳ ಜಯ ಗಳಿಸಿತು. ಟಾಸ್ ಸೋತು ಬ್ಯಾಟಿಂಗ್ ಗೆ ಇಳಿದಿದ್ದ ದಕ್ಷಿಣ ಆಫ್ರಿಕಾ ನಿಗದಿತ 50 ಒವರ್ ಗಳಲ್ಲಿ ದಾಖಲೆಯ ಮೂರೂ ಶತಕ ಸಹಿತ ವಿಶ್ವಕಪ್ ಇತಿಹಾಸದಲ್ಲಿನ ದಾಖಲೆಯ 428 ರನ್ ಗಳ ಬೃಹತ್ ಮೊತ್ತ
ಪೇರಿಸಿತ್ತು. 429 ರನ್ ಗಳ ಕಠಿಣ ಗುರಿ ಬೆನ್ನಟ್ಟಿದ ಶ್ರೀಲಂಕಾ 44.5 ಒವರ್‌ನಲ್ಲಿ 326 ರನ್‌ಗೆ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡಿತು. ಸ್ಪೋಟಕ ಬ್ಯಾಟಿಂಗ್ ಮಾಡಿದ ಕುಸಾಲ್ ಮೆಂಡಿಸ್ 4 ಬೌಂಡರಿ 8 ಸಿಕ್ಸರ್ ಸಹಿತ 76 ಗಳಿಸಿ ಲಂಕನ್ನರಲ್ಲಿ ಗೆಲುವಿನ ಆಸೆ ಮೂಡಿಸಿದ್ದರು. 5 ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಚರಿತ್ ಹಸಲಂಕ 79 ಹಾಗೂ ನಾಯಕ ದಾಸನ್ ಶನಕ 68 ಗಳಿಸಿದರೂ ತಂಡವನ್ನು ಗೆಲುವಿನ ದಡ ಸೇರಿಸಲು ಆಗಲಿಲ್ಲ.ಆಫ್ರಿಕಾ ಪರ ಜೆರಾಲ್ಡ್ 3 ಪಡೆದರೆ ಮಾರ್ಕೋ ಜಾನ್ಸನ್ ಮತ್ತು ಕೇಶವ್ ಮಹಾರಾಜ್, ರಬಾಡ ತಲಾ 2 ವಿಕೆಟ್ ಕಬಳಿಸಿದರು. ಲುಂಗಿ ಗಿಡಿ ಒಂದು ವಿಕೆಟ್ ಪಡೆದರು.
ಮೊದಲು ಬ್ಯಾಟ್ ಮಾಡಿದ ಆಫ್ರಿಕಾ ಪರ ಕ್ವಿಂಟನ್ ಡಿಕಾಕ್ (100), ರಸ್ಸೀ ವ್ಯಾನ್‌ಡರ್‌ಸಾನ್ (108) ಹಾಗೂ ಏಡೆನ್ ಮಾರ್ಕರಮ್ (106) ಆಕರ್ಷಕ ಶತಕ ಬಾರಿಸಿದರು. ಮಾರ್ಕರಮ್ ವಿಶ್ವಕಪ್‌ನ ಅತಿ ವೇಗದ ಶತಕ ಸಿಡಿಸಿ ದಾಖಲೆ ಬರೆದರು. ಮಾರ್ಕರಮ್ 49 ಎಸೆತಗಳಲ್ಲಿ ಶತಕ ಸಿಡಿಸಿ ಅಬ್ಬರಿಸಿದರು. ಹೆನ್ರಿಚ್ ಕ್ಲಾಸೆನ್ 32 ಹಾಗೂ ಡೇವಿಡ್ ವಾರ್ನರ್ ಅಜೇಯ 39 ರನ್‌ಗಳ ಉಪಯುಕ್ತ ಕಾಣಿಕೆ ನೀಡಿದರು.
ವಿಶ್ವಕಪ್‌ನಲ್ಲಿ ಅತಿ ವೇಗದ ಶತಕ ಹಾಗೂ ವಿಶ್ವಕಪ್‌ನಲ್ಲಿ ತಂಡವೊಂದು ಪೇರಿಸಿದ ಬೃಹತ್ ಮೊತ್ತ ದಾಖಲಾಯಿತು.
