ಮರ್ಕಂಜ:ನಾಲ್ಕು ಗೋಡೆಯ ಮಧ್ಯೆಯ ಸಿಲಬಸ್ ಪಠ್ಯದಿಂದ ಭಿನ್ನವಾಗಿ ವಿದ್ಯಾರ್ಥಿಗಳಿಗೆ ನೇಗಿಲ ಯೋಗಿಯ ಪಾಠ. ಕೆಸರು ಗದ್ದೆಯಲ್ಲಿ ಮಿಂದೆದ್ದ ವಿದ್ಯಾರ್ಥಿಗಳು ನಕ್ಕು ನಲಿದು ಸಂಭ್ರಮಿಸಿದರು. ಓ ಬೇಲೆ..ಕಂಡತ ಬೇಲೆ ಹಾಡಿನ ಸೊಗಡಿಗೆ ನೇಜಿ ನೆಟ್ಟರು. ಕೆಸರು ಗದ್ದೆಯಲ್ಲಿ ಹಾಡು, ನೃತ್ಯದೊಂದಿಗೆ ಕುಣಿದು ಕುಪ್ಪಳಿಸಿದರು. ಸುಳ್ಯದ ಕೆವಿಜಿ ಇಂಟರ್ ನ್ಯಾಷನಲ್ ಪಬ್ಲಿಕ್ ಸ್ಕೂಲ್‌ನ ಮಕ್ಕಳಿಗೆ ಮರ್ಕಂಜದ
ಜಗದೀಶ ರೈ ಪಟ್ಟೆ ಅವರ ಗದ್ದೆಯಲ್ಲಿ ಜೂ .29 ರಂದು ಏರ್ಪಡಿಸಿದ್ದ ಕೆಸರುಗದ್ದೆ ಹಬ್ಬ ಸಂಭ್ರಮದ ಅಲೆಯೆಬ್ಬಿಸಿತು…
ಈ ಕಾರ್ಯಕ್ರಮಕ್ಕೆ ಶಾಲಾ ಸಂಚಾಲಕ ಡಾ. ರೇಣುಕಾ ಪ್ರಸಾದ್ ಕೆ ವಿ ಮತ್ತು ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಡಾ. ಉಜ್ವಲ್ ಯು.ಜೆ ಶುಭ ಹಾರೈಸಿದರು. ಕಾರ್ಯಕ್ರಮವನ್ನು ಪ್ರಾರ್ಥನೆಯ ಮೂಲಕ ಆರಂಭಿಸಲಾಯಿತು. ಬಳಿಕ ಶಾಲಾ ಪ್ರಾಂಶುಪಾಲ ಅರುಣ್ ಕುಮಾರ್ ಉಪ ಪ್ರಾಂಶುಪಾಲೆ ಶಿಲ್ಪ ಬಿದ್ದಪ್ಪ ಮತ್ತು ವೇದಿಕೆಯಲ್ಲಿದ್ದ ಗಣ್ಯರಾದ
ಜಗದೀಶ ರೈ ಪಟ್ಟೆ , ಇಂಚರ ಪಡ್ಡಂಬೈಲು,ಹರೀಶ್ ಕಂಜಿಪಿಲಿ, ಗಂಗಾಧರ ಪಿ. ಎಸ್ , ಸಂತೋಷ್ ಕುತ್ತಮೊಟ್ಟೆ ದೀಪ ಬೆಳಗಿಸಿ, ಹಿಂಗಾರವನ್ನು ಅರಳಿಸಿ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. ಊರಿನ ಹಿರಿಯರಾದ ಬಾಲಕೃಷ್ಣ ರೈ ಓ‌ಬೇಲೆ ಹಾಡನ್ನು ಹೇಳುತ್ತಾ, ಉಳಿದವರು ಅವರ ಹಾಡನ್ನು ಅನುಕರಿಸುತ್ತಾ ಗದ್ದೆಗೆ ಇಳಿದು ನಾಟಿ ಮಾಡುವುದು ಹೇಗೆ ಎಂಬುದಾಗಿ ತಿಳಿಸಿ ಕೊಟ್ಟರು .
10ನೇ ತರಗತಿಯ ಪುನರ್ವಿ ‘ ಕೆಸರುಗದ್ದೆಯಲ್ಲಿ ಆಟವಾಡುವುದರಿಂದ ಆರೋಗ್ಯ ವೃದ್ದಿಯಾಗುತ್ತದೆ ‘ ಎಂಬ ವೈಜ್ಞಾನಿಕ ಕಾರಣದ ಬಗ್ಗೆ ತಿಳಿಸಿದರು.ಬಳಿಕ ಮಕ್ಕಳ ಸಂತೋಷಕ್ಕೆ ಗದ್ದೆಯನ್ನು ಕಲ್ಪಿಸಿಕೊಟ್ಟ ಜಗದೀಶ ರೈ ಪಟ್ಟೆ ಮತ್ತು ಸಿಜು ಸಿ ಎಸ್ ಅವರನ್ನು ಗೌರವಿಸಲಾಯಿತು. ಮುಖ್ಯ ಅತಿಥಿಗಳಾಗಿದ್ದ ಇಂಚರ ಪಡ್ಡಂಬೈಲ್, ಹರೀಶ್ ಕಂಜಿಪಿಲಿ ಪಿ.ಎಸ್.ಗಂಗಾಧರ, ಸಂತೋಷ್ ಕುತ್ತಮೊಟ್ಟೆ ಶುಭ ಹಾರೈಸಿದರು. ವಿದ್ಯಾರ್ಥಿ ವಿದ್ಯಾರ್ಥಿನಿಯರು ಮತ್ತು ಶಿಕ್ಷಕಿಯರು ಸುಗ್ಗಿ ಹಾಡು ನೃತ್ಯವನ್ನು ಮಾಡಿ ಮನರಂಜಿಸಿದರು. ಬಳಿಕ ವಿದ್ಯಾರ್ಥಿಗಳಿಗೆ ಮತ್ತು ಶಿಕ್ಷಕ ವೃಂದದವರಿಗೆ ಕೆಸರು ಗದ್ದೆಯಲ್ಲಿ ವಿವಿಧ ಆಟೋಟ ಸ್ಪರ್ಧೆಗಳನ್ನು ಆಯೋಜಿಸಲಾಗಿತ್ತು. ಹತ್ತನೇ ತರಗತಿಯ ಅನೀಶ್ ಮತ್ತು ಸಾನ್ವಿ ಕಾರ್ಯಕ್ರಮ ನಿರೂಪಿಸಿದರು. ಸೋನಾ ನಾರ್ಕೋಡು ಸ್ವಾಗತಿಸಿ ಧ್ರುವ ವಂದಿಸಿದನು.ಕಾರ್ಯಕ್ರಮದಲ್ಲಿ ಶಾಲಾ ಶಿಕ್ಷಕ ಮತ್ತು ಶಿಕ್ಷಕೇತರವೃಂದದವರು, ಊರಿನ ಕ್ರೀಡಾಭಿಮಾನಿಗಳು ಉಪಸ್ಥಿತರಿದ್ದರು.
