ಕೊಲಂಬೊ :ಚರಿತ್‌ ಅಸಲಂಕ ಅವರನ್ನು ಪ್ರವಾಸಿ ಭಾರತ ತಂಡದ ವಿರುದ್ಧ ಇದೇ 27ರಂದು ಆರಂಭವಾಗುವ ಟಿ20 ಸರಣಿಗೆ ಶ್ರೀಲಂಕಾ ತಂಡದ ನಾಯಕರಾಗಿ ನೇಮಕ ಮಾಡಲಾಗಿದೆ.ಮೂರು ಟಿ20 ಪಂದ್ಯಗಳು ಕ್ರಮವಾಗಿ ಜುಲೈ 27, 28 ಮತ್ತು 30ರಂದು ನಡೆಯಲಿವೆ. ಈ ಹಿಂದೆ ನಾಯಕರಾಗಿದ್ದ ಆಲ್‌ರೌಂಡರ್‌ ವನಿಂದು ಹಸರಂಗ ಅವರು ಕಳೆದ ತಿಂಗಳ ಟಿ20 ವಿಶ್ವಕಪ್‌ನಲ್ಲಿ ಶ್ರೀಲಂಕಾ ತಂಡದ ಕಳಪೆ ನಿರ್ವಹಣೆ ಕಾರಣ
ಪದತ್ಯಾಗ ಮಾಡಿದ್ದರು.27 ವರ್ಷದ ಅಸಲಂಕ ಅವರು ಈ ಹಿಂದೆಯೂ ನಾಯಕರಾಗಿ ಅನುಭವ ಹೊಂದಿದ್ದಾರೆ.
19 ವರ್ಷದೊಳಗಿನವರ ತಂಡಕ್ಕೆ ನಾಯಕರಾಗಿದ್ದ ಅವರು ಲಂಕಾ ಪ್ರೀಮಿಯರ್ ಲೀಗ್‌ನಲ್ಲಿ ಜಾಫ್ನಾ ಕಿಂಗ್ಸ್ ತಂಡವನ್ನು ಮುನ್ನಡೆಸಿದ್ದಾರೆ. 16 ಮಂದಿಯ ತಂಡದಲ್ಲಿ ಅನುಭವಿಗಳ ಜೊತೆ ಯುವಮುಖಗಳೂ ಇವೆ.
ಆಲ್‌ರೌಂಡರ್‌ಗಳಾದ ಆ್ಯಂಜೆಲೊ ಮ್ಯಾಥ್ಯೂಸ್, ಧನಂಜಯ ಡಿ ಸಿಲ್ವ, ವಿಕೆಟ್ ಕೀಪರ್‌ ಸದೀರ ಸಮರವಿಕ್ರಮ ಮತ್ತು ಎಡಗೈ ವೇಗದ ಬೌಲರ್‌ ದಿಲ್ಶನ್ ಮದುಶಂಕ ಅವರನ್ನು ಕೈಬಿಡಲಾಗಿದೆ. ಇವರು ಟಿ20 ವಿಶ್ವಕಪ್ ತಂಡದಲ್ಲಿದ್ದರು. ದಿನೇಶ್ ಚಾಂಡಿಮಲ್, ಕುಶಲ್ ಜೆ.ಪೆರೀರಾ ತಂಡಕ್ಕೆ ವಾಪಸಾಗಿದ್ದಾರೆ.ಆಲ್‌ರೌಂಡರ್‌ ಚಮಿಂದು ವಿಕ್ರಮಸಿಂಘೆ ಅವರನ್ನು ಮೊದಲ ಬಾರಿ ತಂಡಕ್ಕೆ ಆಯ್ಕೆ ಮಾಡಲಾಗಿದೆ.
ಸೂರ್ಯಕುಮಾರ್ ಯಾದವ್ ನೇತೃತ್ವದ ಭಾರತ ಟಿ20 ತಂಡ ಸೋಮವಾರ ರಾತ್ರಿ ಇಲ್ಲಿಗೆ ಬಂದಿಳಿದಿದೆ.
ತಂಡ ಹೀಗಿದೆ:
ಚರಿತ್‌ ಅಸಲಂಕ (ನಾಯಕ), ಪಥುಮ್ ನಿಸಾಂಕ, ಕುಶಲ್ ಪೆರೀರಾ (ವಿಕೆಟ್ ಕೀಪರ್‌), ಅವಿಷ್ಕಾ ಫೆರ್ನಾಂಡೊ, ಕುಶಲ್ ಮೆಂಡಿಸ್‌, ದಿನೇಶ್ ಚಾಂಡಿಮಲ್, ಕಮಿಂದು ಮೆಂಡಿಸ್‌, ದಸುನ್ ಶನಕ, ವನಿಂದು ಹಸರಂಗ, ದುನಿತ್‌ ವೆಲ್ಲಾಳಗೆ, ಮಹೀಶ ತೀಕ್ಷಣ, ಚಮಿಂದು ವಿಕ್ರಮಸಿಂಘೆ, ಮತೀಶ ಪಥಿರಾಣ, ನುವಾನ್ ತುಷಾರ, ದುಷ್ಮಂತ ಚಮೀರ ಮತ್ತು ಬಿನುರ ಫೆರ್ನಾಂಡೊ.
