ಸುಬ್ರಹ್ಮಣ್ಯ: ಶಾಲಾ ಶಿಕ್ಷಣ ಇಲಾಖೆ ದ.ಕ ಹಾಗೂ ಶ್ರೀ ಸುಬ್ರಹ್ಮಣ್ಯೇಶ್ವರ ಪದವಿಪೂರ್ವ ಕಾಲೇಜಿನ ಆಶ್ರಯದಲ್ಲಿ ಸುಬ್ರಹ್ಮಣ್ಯದ ಎಸ್ಎಸ್ಪಿಯು ಕಾಲೇಜಿನ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಜಿಲ್ಲಾ ಮಟ್ಟದ ಪದವಿಪೂರ್ವ ಕಾಲೇಜು ವಿಭಾಗದ ಬಾಲಕ, ಬಾಲಕಿಯರ ವಾಲಿಬಾಲ್ ಪಂದ್ಯಾಟದ ಎರಡೂ ವಿಭಾಗದಲ್ಲೂ ಬೆಳ್ತಂಡಿ ತಾಲೂಕು ಪ್ರಥಮ ಸ್ಥಾನ ಗಳಿಸಿ ಚಾಂಪಿಯನ್ ಪಟ್ಟವನ್ನು ಅಲಂಕರಿಸಿತು.ಜಿದ್ದಾಜಿದ್ದಿನಿಂದ ಕೂಡಿದ್ದ
ಅಂತಿಮ ಹಣಾಹಣಿಯಲ್ಲಿ ಬೆಳ್ತಂಗಡಿ ತಂಡವು ಬಾಲಕರ ವಿಭಾಗದಲ್ಲಿ ಮೂಡಬಿದ್ರೆ ತಂಡವನ್ನು ಮತ್ತು ಬಾಲಕಿಯರ ವಿಭಾಗದಲ್ಲಿ ಮಂಗಳೂರು ತಂಡವನ್ನು ಸೋಲಿಸಿ ಪ್ರಶಸ್ತಿಯ ಗರಿಯನ್ನು ಮುಡಿಗೇರಿಸಿಕೊಂಡಿತು.
ಬಾಲಕರ ವಿಭಾಗ:
ಬಾಲಕರ ವಿಭಾಗದ ಅಂತಿಮ ಹಣಾಹಣೆಯಲ್ಲಿ ಬೆಳ್ತಂಗಡಿ ತಾಲೂಕು ತಂಡ(ಎಸ್ಡಿಎಂಸಿ ಉಜಿರೆ)ಯು ಮೂಡಬಿದ್ರೆ ತಾಲೂಕು ತಂಡ(ಆಳ್ವಾಸ್ ಮೂಡಬಿದ್ರೆ)ಯನ್ನು 25-14 ಮತ್ತು 25-17 ನೇರ ಸೆಟ್ನಿಂದ ಸೋಲಿಸಿತು.ಮೂಡಬಿದ್ರೆ ತಂಡವು ದ್ವಿತೀಯ ಸ್ಥಾನಿಯಾಯಿತು. ಬೆಳ್ತಂಗಡಿ ತಂಡವು ಮಂಗಳೂರು ತಂಡವನ್ನು ಹಾಗೂ ಮೂಡಬಿದ್ರೆ ತಂಡವು ಮೂಲ್ಕಿ ತಂಡವನ್ನು ಸೆಮಿ ಪೈನಲ್ನಲ್ಲಿ ಸೋಲಿಸಿ ಪೈನಲ್ಗೇರಿತ್ತು. ಬಾಲಕರ ವಿಭಾಗದಲ್ಲಿ ಬೆಳ್ತಂಗಡಿಯ ಪ್ರತೀಕ್(ಉತ್ತಮ ಅಟಾಕರ್), ಬೆಳ್ತಂಗಡಿಯ ಸುಭಾಸ್(ಉತ್ತಮ ಸೆಟ್ಟರ್) ಮತ್ತು ಮೂಡಬಿದ್ರೆಯ ರಾಕೇಶ್(ಆಲ್ ರೌಂಡರ್) ವೈಯಕ್ತಿಕ ಬಹುಮಾನ ಪಡೆದರು.
![](https://thesulliamirror.com/wp-content/uploads/2023/09/IMG_20230925_201826.jpg)
ಬಾಲಕಿಯರ ವಿಭಾಗ:
ಬಾಲಕಿಯರ ವಿಭಾಗದ ಅಂತಿಮ ಹಣಾಹಣೆಯಲ್ಲಿ ಬೆಳ್ತಂಗಡಿ ತಾಲೂಕು ತಂಡ(ಮುಂಡಾಜೆ ಪ.ಪೂ ಕಾಲೇಜು)ಯು ಮಂಗಳೂರು ತಾಲೂಕು ತಂಡ(ಸಂತ ಅಲೋಷಿಯಸ್ ಕಾಲೇಜು ಮಂಗಳೂರು)ವನ್ನು 25-20 ಮತ್ತು 25-16 ನೇರ ಸೆಟ್ನಿಂದ ಸೋಲಿಸಿತು.ಮಂಗಳೂರು ತಂಡವು ದ್ವಿತೀಯ ಸ್ಥಾನಿಯಾಯಿತು. ಬೆಳ್ತಂಗಡಿ ತಂಡವು ಮೂಡಬಿದ್ರೆ ತಂಡವನ್ನು ಹಾಗೂ ಮಂಗಳೂರು ತಂಡವು ಪುತ್ತೂರು ತಂಡವನ್ನು ಸೆಮಿ ಪೈನಲ್ನಲ್ಲಿ ಸೋಲಿಸಿ ಪೈನಲ್ಗೇರಿತ್ತು. ಬಾಲಕಿಯರ ವಿಭಾಗದಲ್ಲಿ ಬೆಳ್ತಂಗಡಿ ತಂಡದ ವರ್ಷಾ(ಉತ್ತಮ ಎಟಾಕರ್), ಮಂಗಳೂರಿನ ಹುಲಿಗೆಮ್ಮ(ಉತ್ತಮ ಸೆಟ್ಟರ್) ಮತ್ತು ಮುಂಡಾಜೆಯ ಅಶ್ವಿನಿ.ಕೆ(ಆಲ್ ರೌಂಡರ್) ವೈಯಕ್ತಿಕ ಬಹುಮಾನ ಪಡೆದರು.
![](https://thesulliamirror.com/wp-content/uploads/2023/09/IMG_20230925_201836.jpg)
ಬಹುಮಾನ ವಿತರಣೆ:
ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ, ಶ್ರೀ ದೇವಳದ ವ್ಯವಸ್ಥಾಪನಾ ಸಮಿತಿ ಸದಸ್ಯ ಶ್ರೀವತ್ಸ ಬೆಂಗಳೂರು, ದ.ಕ ಜಿಲ್ಲಾ ಕ್ರೀಡಾ ಸಂಯೋಜಕ ಅರುಣ್ ಡಿಸೋಜಾ, ಜಿಲ್ಲಾ ಕಬಡ್ಡಿ ರೆಫ್ರಿ ಎಸೋಸಿಯೇಶನ್ನ ಅಧ್ಯಕ್ಷ ಶಿವರಾಮ ಯೇನೆಕಲ್ಲು, ಗ್ರಾ.ಪಂ.ಉಪಾಧ್ಯಕ್ಷ ವೆಂಕಟೇಶ್ ಎಚ್.ಎಲ್, ಗ್ರಾ.ಪಂ.ಸದಸ್ಯೆ ಭಾರತಿ ದಿನೇಶ್, ಸುಬ್ರಹ್ಮಣ್ಯ ರೋಟರಿ ಕ್ಲಬ್ ಪೂರ್ವಾಧ್ಯಕ್ಷ ಗಿರಿಧರ್ ಸ್ಕಂಧ, ಕಾಲೇಜಿನ ಪ್ರಾಂಶುಪಾಲ ಸೋಮಶೇಖರ್ ನಾಯಕ್, ಹಿರಿಯ ವಿದ್ಯಾರ್ಥಿ ಸಂಘದ ಅಧ್ಯಕ್ಷ ರಾಜೇಶ್ ಎನ್.ಎಸ್, ಶಿಕ್ಷಕ ರಕ್ಷಕ ಸಂಘದ ಉಪಾಧ್ಯಕ್ಷ ಚಿದಾನಂದ ಕಂದಡ್ಕ, ದೈಹಿಕ ಶಿಕ್ಷಣ ಉಪನ್ಯಾಸಕ ರಾಧಾಕೃಷ್ಣ ಚಿದ್ಗಲ್,ವಿದ್ಯಾರ್ಥಿ ಸಂಘದ ಸಂಚಾಲಕ ಜಯಪ್ರಕಾಶ್ ಆರ್ ವಿಜೇತರಿಗೆ ಬಹುಮಾನ ವಿತರಿಸಿದರು.ಕಡಬ, ಸುಳ್ಯ,ಪುತ್ತೂರು, ಬೆಳ್ತಂಗಡಿ, ಬಂಟ್ವಾಳ, ಉಳ್ಳಾಲ, ಮೂಡಬಿದ್ರೆ, ಮಂಗಳೂರು, ಮೂಲ್ಕಿ ತಾಲೂಕಿನ ಬಾಲಕ ಮತ್ತು ಬಾಲಕಿಯರ ತಂಡಗಳು ಚಾಂಪಿಯನ್ಶಿಪ್ ಗಾಗಿ ಸೆಣಸಾಡಿದವು.