ಕುಕ್ಕುಜಡ್ಕ:39 ವರ್ಷಗಳ ಸೇವೆಯ ಬಳಿಕ ನಿವೃತ್ತರಾಗಿ ಹುಟ್ಟೂರಿಗೆ ಆಗಮಿಸಿದ ಬಿಎಸ್ಎಫ್ ಯೋಧ ಬಾಲಕೃಷ್ಣ ಎನ್ ಬಿ ಅವರಿಗೆ ಹುಟ್ಟೂರಿನಲ್ಲಿ ಅದ್ಧೂರಿ ಸ್ವಾಗತ ನೀಡಲಾಯಿತು. ಅಮರಪಡ್ನೂರು ಗ್ರಾಮದ ಚೊಕ್ಕಾಡಿ ಗರುಡ ಯುವಕ ಮಂಡಲ, ಮಯೂರಿ ಯುವತಿ ಮಂಡಲ,ವಿಶ್ವ ಹಿಂದೂ ಪರಿಷತ್ ಬಜರಂಗದಳ, ಪಂಚಶ್ರೀ ಅಕ್ಕೋಜಿಪಾಲ್, ವಜ್ರಕಾಯ ಶಾಖೆ ಹಾಗೂ ಅಟೋ ರಿಕ್ಷಾ ಚಾಲಕ ಮಾಲಕರ ಸಂಘದ ವತಿಯಿಂದ
ಸ್ವಾಗತ ಕಾರ್ಯಕ್ರಮ ಹಮ್ಮಿಕೊಳ್ಳಲಾಯಿತು. ಸುಳ್ಯಕ್ಕೆ ಆಗಮಿಸಿದ ಅವರನ್ನು ದ.ಕ ಮತ್ತು ಉಡುಪಿ ಜಿಲ್ಲೆಯ ಪ್ಯಾರಾ ಮಿಲಿಟರಿ ಅಸೋಸಿಯೇಷನ್ ಜತೆ ಕಾರ್ಯದರ್ಶಿ ನಿವೃತ್ತ ಸಿ.ಆರ್.ಪಿ.ಎಫ್ ಆನಂದ ಬಿ.ಎಂ ರವರು ಸ್ವಾಗತಿಸಿದರು. ಅಮರಪಡ್ನೂರು ಗ್ರಾಮದ ಅಕ್ಕೋಜಿಪಾಲಿನಲ್ಲಿ ಹಾರಾರ್ಪಣೆ ಮಾಡಿ ಸ್ವಾಗತಿಸಿ, ತೆರದ ವಾಹನದಲ್ಲಿ ಬಾಲಕೃಷ್ಣ ಎನ್.ಬಿ ಅವರನ್ನು ವಾಹನ ಜಾಥಾದೊಂದಿಗೆ ಕುಕ್ಕುಜಡ್ಕದಲ್ಲಿ ಸ್ವಾಗತಿಸಲಾಯಿತು.
ಚೊಕ್ಕಾಡಿ ಪೇಟೆಯಲ್ಲಿ ಮತ್ತು ಕುಕ್ಕುಜಡ್ಕ ಪೇಟೆಯಲ್ಲಿ ಏರ್ಪಡಿಸಿದ ಸಮಾರಂಭದಲ್ಲಿ ಊರಿನವರ ಪರವಾಗಿ ನಿವೃತ್ತ ಯೋಧ ಬಾಲಕೃಷ್ಣ ಎನ್.ಬಿ ಯವರನ್ನು ಸನ್ಮಾನಿಸಲಾಯಿತು.ಈ ಸಂದರ್ಭದಲ್ಲಿ ಜಿ.ಪಂ.ಮಾಜಿ ಸದಸ್ಯ ಎಸ್.ಎನ್.ಮನ್ಮಥ ಹಾಗೂ ಪ್ರಗತಿಪರ ಕೃಷಿಕ ಚಿನ್ನಪ್ಪ ಗೌಡ ರವರು ಅಭಿನಂದನಾ ಮಾತುಗಳನ್ನಾಡಿದರು.
ಜಾಥಾದಲ್ಲಿ ಭಾರತ ಮಾತೆಯ ಭಾವಚಿತ್ರವಿದ್ದ ವಾಹನ ಹಾಗೂ ದ್ವಿಚಕ್ರ ಮತ್ತು ಚತುಷ್ಚಕ್ರ ವಾಹನಗಳು ಮೆರವಣಿಗೆಯಲ್ಲಿ ಸಾಗಿ ಬಂತು. ರಾಷ್ಟ್ರ ಧ್ವಜ ಕೈಯಲ್ಲಿ ಹಿಡಿದ ಯುವಕ ಯುವತಿಯರು ಊರಿನವರು ಭಾರತ ಮಾತಾಕಿ ಘೋಷಣೆಯೊಂದಿಗೆ ಮೆರವಣಿಗೆಯಲ್ಲಿ ಸಾಗಿ ಬಂದರು. ಈ ಸಂದರ್ಭದಲ್ಲಿ ಯೋಧರ ಪತ್ನಿ ಜಯಮಾಲಾ ಮತ್ತು ಪುತ್ರಿಯರಾದ ಅಶ್ವಿನಿ ಎನ್.ಬಿ, ಅನನ್ಯ ಎನ್.ಬಿ ಹಾಗೂ ಸಹೋದರರು, ಬಂಧು ವರ್ಗದವರು, ಮಿತ್ರರು ಹಾಗೂ ಸ್ಥಳೀಯ ಸಂಘ ಸಂಸ್ಥೆಗಳ ಪದಾಧಿಕಾರಿಗಳು ಮತ್ತು ಸದಸ್ಯರು ಭಾಗವಹಿಸಿದರು.ಚೊಕ್ಕಾಡಿ ನಡುಗಲ್ಲು ದಿ.ಬಾಬು ಗೌಡ ಮತ್ತು ದಿ.ಸೀತಮ್ಮ ದಂಪತಿಯ ಪುತ್ರ ಬಾಲಕೃಷ್ಣ ಎನ್.ಬಿಯವರು ಬಿಎಸ್‌ಎಫ್‌ನಲ್ಲಿ 39 ವರ್ಷಗಳ ಬಳಿಕ ನಿವೃತ್ತರಾಗಿದ್ದಾರೆ.
