ಲಂಡನ್: ಐಸಿಸಿ ವರ್ಲ್ಡ್ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ನ ಮೊದಲ ದಿನದಾಟದಲ್ಲಿ ಭಾರತ ವಿರುದ್ಧ ಆಸ್ಟ್ರೇಲಿಯ ಕ್ರಿಕೆಟ್ ತಂಡ ಬೃಹತ್ ಮೊತ್ತ ಪೇರಿಸಿದೆ. ಟಾಸ್ ಸೋತ ಆಸ್ಟ್ರೇಲಿಯ ಬ್ಯಾಟಿಂಗ್‌ಗೆ ಆಹ್ವಾನಿಸಲ್ಪಟ್ಟು 85 ಓವರ್‌ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 327 ರನ್ ಗಳಿಸಿತು.
ಮಧ್ಯಮ ಕ್ರಮಾಂಕದ ಬ್ಯಾಟರ್ ಟ್ರಾವಿಸ್ ಹೆಡ್ ಶತಕ (ಔಟಾಗದೆ 146 ರನ್,156 ಎಸೆತ, 22 ಬೌಂಡರಿ, 1 ಸಿಕ್ಸರ್) ಹಾಗೂ ಸ್ಟೀವನ್
ಸ್ಮಿತ್(ಔಟಾಗದೆ 95, 227 ಎಸೆತ, 14 ಬೌಂಡರಿ) ಅರ್ಧಶತಕದ ಕೊಡುಗೆ ನೀಡಿದರು. ಆರಂಭಿಕ ಬ್ಯಾಟರ್ ಉಸ್ಮಾನ್ ಖ್ವಾಜಾ(0)ಖಾತೆ ತೆರೆಯುವಲ್ಲಿ ವಿಫಲರಾದರು. ಡೇವಿಡ್ ವಾರ್ನರ್(43 ರನ್, 60 ಎಸೆತ)ಹಾಗೂ ಮಾರ್ನಸ್ ಲ್ಯಾಬುಶೇನ್(26 ರನ್, 62 ಎಸೆತ)ತಂಡವನ್ನು ಆಧರಿಸಿದರು.
ವಾರ್ನರ್ ಹಾಗೂ ಲ್ಯಾಬುಶೇನ್ ಔಟಾದ ಬಳಿಕ ಜೊತೆಯಾದ ಹೆಡ್ ಹಾಗೂ ಸ್ಮಿತ್ 4ನೇ ವಿಕೆಟ್‌ಗೆ ಮುರಿಯದ ಜೊತೆಯಾಟದಲ್ಲಿ 251 ರನ್ ಸೇರಿಸಿ ತಂಡವನ್ನು ಉತ್ತಮ ಮೊತ್ತದತ್ತ ಮುನ್ನಡೆಸಿತು.
ಸ್ಮಿತ್ 144 ಎಸೆತಗಳಲ್ಲಿ 7 ಬೌಂಡರಿ ನೆರವಿನಿಂದ 38ನೇ ಅರ್ಧಶತಕ ಪೂರೈಸಿದರು. ಹೆಡ್ ಕೇವಲ 106 ಎಸೆತಗಳಲ್ಲಿ 14 ಬೌಂಡರಿ ಹಾಗೂ 1 ಸಿಕ್ಸರ್ ಸಹಾಯದಿಂದ 6ನೇ ಟೆಸ್ಟ್ ಶತಕ ಪೂರೈಸಿದರು.
ಭಾರತದ ಪರ ಮಹಮ್ಮದ್ ಸಿರಾಜ್(1-67), ಮಹಮ್ಮದ್ ಶಮಿ(1-77) ಹಾಗೂ ಶಾರ್ದೂಲ್ ಠಾಕೂರ್(1-75) ತಲಾ ಒಂದು ವಿಕೆಟ್ ಪಡೆದರು.
