ಮುಂಬೈ: ಮುಂಬೈ ಇಂಡಿಯನ್ಸ್ ತಂಡವು ಮಹಿಳಾ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಟೂರ್ನಿಯಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಎದುರು 8 ವಿಕೆಟ್‌ಗಳಿಂದ ಜಯಿಸಿತು. ಟಾಸ್ ಗೆದ್ದ ಡೆಲ್ಲಿ ತಂಡವು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. ಆದರೆ, 18 ಓವರ್‌ಗಳಲ್ಲಿ 105 ರನ್ ಗಳಿಸಿ ಆಲೌಟ್ ಆಯಿತು. ಮುಂಬೈ ತಂಡವು ಇನಿಂಗ್ಸ್‌ನಲ್ಲಿ ಇನ್ನೂ ಐದು ಓವರ್‌ಗಳು
ಬಾಕಿಯಿರುವಾಗಲೇ 2 ವಿಕೆಟ್‌ಗಳಿಗೆ 109 ರನ್ ಗಳಿಸಿ ಜಯಿಸಿತು. ಮುಂಬೈ ಬೌಲರ್‌ಗಳಾದ ಸೈಕಾ ಇಷಕ್, ಹೇಯಲಿ ಮ್ಯಾಥ್ಯೂಸ್ ಹಾಗೂ ಐಸಿ ವಾಂಗ್ ತಲಾ ಮೂರು ವಿಕೆಟ್ ಗಳಿಸಿದರು.
ಬ್ಯಾಟಿಂಗ್‌ನಲ್ಲಿ ಮುಂಬೈ ತಂಡದ ಆರಂಭಿಕ ಜೋಡಿ ಯಷ್ಟಿಕಾ ಭಾಟಿಯಾ (41; 32ಎ, 4X8) ಹಾಗೂ ಹೆಯಲಿ ಮ್ಯಾಥ್ಯೂಸ್ (32; 31ಎ, 4X6) ಮೊದಲ ವಿಕೆಟ್ ಜೊತೆಯಾಟದಲ್ಲಿ 65 ರನ್ ಸೇರಿಸಿದರು. ಇದರಿಂದಾಗಿ ತಂಡದ ಗೆಲುವು ಸುಲಭವಾಯಿತು. ಡೆಲ್ಲಿ ತಂಡದ ನಾಯಕಿ ಹಾಗೂ ಆರಂಭಿಕ ಬ್ಯಾಟರ್ ಮೆಗ್ ಲ್ಯಾನಿಂಗ್ (43; 41ಎ) ಹಾಗೂ ಮಧ್ಯಮ ಕ್ರಮಾಂಕದ ಜೆಮಿಮಾ ರಾಡ್ರಿಗಸ್ (25; 18ಎ) ಬಿಟ್ಟರೆ ಉಳಿದವರಿಂದ ನಿರೀಕ್ಷಿತ ಸಾಮರ್ಥ್ಯ ಮೂಡಿಬರಲಿಲ್ಲ. ಶಫಾಲಿ ವರ್ಮಾ 2 ರನ್ ಗಳಿಸಿ ಔಟಾದರು.
ಇಂದಿನ ಪಂದ್ಯ
ಆರ್‌ಸಿಬಿ–ಯುಪಿ ವಾರಿಯರ್ಸ್
ಆರಂಭ: ರಾತ್ರಿ 7.30ರಿಂದ
