ರಾಯಪುರ: ಸಚಿನ್ ತೆಂಡೂಲ್ಕರ್ ನಾಯಕತ್ವದ ಇಂಡಿಯಾ ಮಾಸ್ಟರ್ಸ್ ತಂಡವು ಚೊಚ್ಚಲ ಇಂಟರ್‌ನ್ಯಾಷನಲ್ ಮಾಸ್ಟರ್ಸ್ ಟಿ20 ಲೀಗ್ ಟೂರ್ನಿಯ ಪ್ರಶಸ್ತಿ ಗೆದ್ದುಕೊಂಡಿತು. ಭಾನುವಾರ ನಡೆದ ಟೂರ್ನಿಯ ಫೈನಲ್ ಪಂದ್ಯದಲ್ಲಿ ಇಂಡಿಯಾ 6 ವಿಕೆಟ್‌ಗಳಿಂದ ವೆಸ್ಟ್ ಇಂಡೀಸ್ ಮಾಸ್ಟರ್ಸ್ ವಿರುದ್ಧ ಜಯಿಸಿತು. ಟಾಸ್ ಗೆದ್ದ ವಿಂಡೀಸ್ ತಂಡವು
ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. ವೆಸ್ಟ್ ಇಂಡೀಸ್ 20 ಓವರ್‌ಗಳಲ್ಲಿ 7 ವಿಕೆಟ್‌ಗಳಿಗೆ 148 ರನ್‌ಗಳ ಸಾಧಾರಣ ಮೊತ್ತ ಗಳಿಸಿತು. ಡ್ವೆನ್ ಸ್ಮಿತ್ (45; 35ಎ, 4X6, 6X2) ಮತ್ತು ಅರ್ಧಶತಕ ಗಳಿಸಿದ ಲೆಂಡ್ಲ್ ಸಿಮನ್ಸ್ (57; 41ಎ, 4X5, 6X1) ಅವರು ತಂಡವು ಅಲ್ಪಮೊತ್ತಕ್ಕೆ ಕುಸಿಯುವುದನ್ನು ತಪ್ಪಿಸಿದರು.
ಗುರಿ ಬೆನ್ನಟ್ಟಿದ ಆತಿಥೇಯ ತಂಡದ ಆರಂಭಿಕ ಬ್ಯಾಟರ್ ಅಂಬಟಿ ರಾಯುಡು (74; 50ಎ, 4X9, 6X3) ಅರ್ಧಶತಕ ಹೊಡೆದರು. ಇದರಿಂದಾಗಿ ತಂಡವು 17.1 ಓವರ್‌ಗಳಲ್ಲಿ 4ಕ್ಕೆ149 ರನ್ ಗಳಿಸಿತು. ನಾಯಕ ಸಚಿನ್ 18 ಎಸೆತಗಳಲ್ಲಿ 25 ರನ್ ಗಳಿಸಿದರು. 2 ಬೌಂಡರಿ, 1 ಸಿಕ್ಸರ್ ಬಾರಿಸಿದರು. ಸ್ಟುವರ್ಟ್ ಬಿನ್ನಿ ಅವರು ಕೊನೆಯಲ್ಲಿ ಅಬ್ಬರಿಸಿದರು. 2 ಅಮೋಘ ಸಿಕ್ಸರ್ ಹೊಡೆದ ಅವರು ಕೇವಲ 8 ಎಸೆತಗಳಲ್ಲಿ 15 ರನ್ ಗಳಿಸಿದರು. ತಂಡವನ್ನು ಗೆಲುವಿನ ದಡ ಸೇರಿಸಿದರು.
ವಿಂಡೀಸ್ ತಂಡದ ಬ್ಯಾಟಿಂಗ್ ಪಡೆಯು ವಿನಯ್ ದಾಳಿಗೆ ಕುಸಿಯಿತು. ಡ್ವೇನ್ ಸ್ಮಿತ್ 45, ಲೆಂಡ್ಲ್ ಸಿಮನ್ಸ್ 57, ದಿನೇಶ್ ರಾಮದೀನ್ ಔಟಾಗದೇ 12, ಭಾರತದ ಪರ ಆರ್. ವಿನಯಕುಮಾರ್ 26ಕ್ಕೆ3, ಶಾಬಾಜ್ ನದೀಪ್ 12ಕ್ಕೆ2, ಪವನ್ ನೇಗಿ 30ಕ್ಕೆ1, ಸ್ಟುವರ್ಟ್ ಬಿನ್ನಿ 11ಕ್ಕೆ1 ವಿಕೆಟ್ ಪಡೆದರು. ಇಂಡಿಯಾ ಮಾಸ್ಟರ್ಸ್ ಪರ
ಅಂಬಟಿ ರಾಯುಡು 74, ಸಚಿನ್ ತೆಂಡೂಲ್ಕರ್ 25, ಗುರುಕೀರತ್ ಸಿಂಗ್ ಮಾನ್ 14, ಯುವರಾಜ್ ಸಿಂಗ್ ಅಜೇಯ 13 ರನ್ ಬಾರಿಸಿದರು.
